Májilis eń tómengi jalaqy týraly Halyqaralyq eńbek uıymynyń konventsııasyn qaramaqshy

ASTANA. KAZINFORM — Májilis spıkeri Erlan Qoshanovtyń tóraǵalyǵymen Bıýro otyrysy ótip, aldaǵy jalpy otyrystyń kún tártibi naqtylandy. Bul týraly Májilistiń baspasóz qyzmeti málim etti. 

— Aldaǵy jalpy otyrysta depýtattarǵa «Damýshy elderdi erekshe eskere otyryp, eń tómen jalaqyny belgileý týraly konventsııany (131-konventsııa) ratıfıkatsııalaý týraly» zań jobasyn qaraý usynylady. Konventsııany ratıfıkatsııalaý eń tómen jalaqyny belgileý bóliginde halyqaralyq standarttardy odan ári engizýdi qamtamasyz etedi jáne Qazaqstannyń osy saladaǵy halyqaralyq normalardy saqtaý men oryndaýǵa beıildigin rastaıdy, — delingen habarlamada.

Sonymen qatar Májilistiń talqylaýyna Qazaqstan men Qatar Memleketiniń úkimetteri arasyndaǵy Qazaqstannan kelgen jumyskerlerdi Qatarǵa jumysqa ornalastyrýdy retteý týraly kelisim usynylady. Qujatta taraptardyń ózara is-qımyl tártibi, jumys berýshi men jumysker arasyndaǵy eńbek sharttaryn jasasý talaptary, sondaı-aq jumyskerlerdi repatrıatsııalaý máseleleri aıqyndalady.

Májilis komıtetteri birqatar zań jobasyn jumysqa alady. Atap aıtqanda, «Qazaqstan Respýblıkasyndaǵy bankter jáne bank qyzmeti týraly», Perýmen ustap berý jáne sottalǵan adamdardy berý, qylmystyq ister boıynsha ózara quqyqtyq kómek týraly sharttardy ratıfıkatsııalaý, Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasy, sondaı-aq 1992 jylǵy Shekaraaralyq sý arnalary men halyqaralyq kólderdi qorǵaý jáne paıdalaný jónindegi konventsııaǵa Sý jáne densaýlyq problemalary týraly hattama bar.

Búgin sondaı-aq Erlan Qoshanov Parlament palatalarynyń birlesken otyrysyn shaqyrdy.