Májilis elimizdiń Tsıfrlyq kodeksin qabyldady
ASTANA. KAZINFORM — Búgin Májilisti jalpy otyrysynda Qazaqstan Respýblıkasynyń Tsıfrlyq kodeksi men oǵan ilespe eki qujat qabyldanyp, Senat qaraýyna jiberildi.
Kodeks jobasy adam múddeleriniń basymdyǵyna; tsıfrlyq ortada jeke tulǵanyń, qoǵamnyń jáne memlekettiń qaýipsizdigin qamtamasyz etýge; Qazaqstan Respýblıkasynyń zańdaryna sáıkes qoljetimdiligi shektelmegen tsıfrlyq jazbalardy izdeý, qalyptastyrý jáne berý erkindigine; Qazaqstan Respýblıkasynyń zańdaryna sáıkes qoljetimdiligi shektelmegen memlekettik tsıfrlyq resýrstar men júıelerge qol jetkizý erkindigine; jeke jáne qoǵamdyq múddelerdiń teńgerimin qamtamasyz etýge baǵyttalǵan.
Budan basqa, Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý boıynsha túzetýler, sondaı-aq jekelegen naqtylaýshy normalar men zań jobasynyń mazmunyn jaqsartatyn normalar engizildi.
— Búginde Qazaqstan tsıfrlandyrý salasyndaǵy birqatar halyqaralyq bastamany qoldaıdy jáne olardyń bastamashysy sanalady. Kodekstiń erejeleri adam quqyqtaryn qorǵaýdyń jáne tsıfrlyq ortany retteýdiń halyqaralyq standarttaryna sáıkes keledi, bul rette eldiń tsıfrlyq damýdy quqyqtyq retteýge egemendi kózqarasyn kórsetedi. Zań jobasy keń qoǵamdyq talqylaýdan ótti. Joba jumysyna júzden astam zańger ǵalymdar, azamattyq quqyq salasyndaǵy sarapshylar, bıznes ókilderi, aqparattyq qaýipsizdik mamandary qatysty. Biz jobany talqylaý úshin ashyq resýrstardan myńnan astam usynystar aldyq. Jumys kólemi men qarqyny óte joǵary boldy, — dedi qujat boıynsha negizgi baıandama jasaǵan Májilis depýtaty Ekaterına Smyshlıaeva.
Aıta ketelik búgin Májilistiń jalpy otyrysynda Premer-mınıstrdiń orynbasary Qanat Bozymbaev el turǵyndary memlekettik organdarǵa qandaı máselelermen jıi júginetinin aıtty.