Májilis elimizdiń energetıkalyq qaýipsizdigin qamtamasyz etetin zań jobasyn maquldady

ASTANA. KAZINFORM —Búgin Májilistiń jalpy otyrysynda «Jer qoınaýy jáne jer qoınaýyn paıdalaný týraly» kodekske kómirsýtekter men ýran salasyndaǵy jer qoınaýyn paıdalanýdy jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Qujat boıynsha negizgi baıandama jasaǵan depýtat Edil Jańbyrshınniń aıtýynsha, ony qabyldaǵan jaǵdaıda mynadaı nátıjelerge qol jetkiziledi:

- 1 mlrd AQSh dollary kóleminde jańa ınvestıtsııa tartylady;

- az zerttelgen aýmaqtardyń jer qoınaýyn barlaýǵa jáne ıgerýge jol ashylyp, jańa geologııalyq aqparat alynady;

- kómirsýtek salasynda ınvestorlar men ulttyq kompanııalar úshin teń jaǵdaı ornatylady;

- geologııalyq barlaý men óndirý arasyndaǵy alshaqtyq qysqartylyp, resýrstar ónerkásiptik aınalymǵa tez engiziledi;

- ýran salasyndaǵy ulttyq kompanııaǵa ýrandy barlaý boıynsha basymdyq quqyǵy beriledi.

- Búgin qaralyp otyrǵan zań jobasy — elimizdiń energetıkalyq qaýipsizdigin, ınvestıtsııalyq tartymdylyǵyn jáne geologııalyq ǵylymnyń jańa deńgeıin qamtamasyz etetin strategııalyq qujat. Sonymen qatar, bul zań – Qazaqstannyń tabıǵı baılyǵyn ult ıgiligine aınaldyrý jolyndaǵy mańyzdy qadam, - dedi depýtat.

Aıta keteıik, qazirgi ýaqytta Májilis kómirsýtekter men ýran salasyndaǵy jer qoınaýyn paıdalanýdy jetildirý máseleleri kózdelgen zań jobasyn qarap jatyr.