Májilis elektromobıl ıelerin turaqta aqy tóleýden bosatatyn zańdy qabyldady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ekologııalyq taza kólikti tanymal etý jáne elektromobılderge arnalǵan ınfraqurylymdy damytý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Bul zańǵa Parlament Májilisiniń depýtattary bastamashy bolyp, palata 2024 jylǵy 17 qańtarda birinshi oqylymda maquldady. Zańnyń maqsaty - elektrmobılder ınfraqurylymyn damytý.
Májilistiń Ekologııa máseleleri jáne tabıǵat paıdalaný komıtetiniń málimetinshe, qujat aıasynda QR Jer kodeksine, sondaı-aq «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly», «Avtomobıl joldary týraly», «Avtomobıl kóligi týraly», «Elektr energetıkasy týraly», «Erekshe qorǵalatyn tabıǵı aýmaqtar týraly» jáne «Jol júrisi týraly» zańdaryna ózgerister men tolyqtyrýlar engiziledi.
Zańnyń negizgi normalary:
- «elektromobıl» jáne «elektrqýattaý stantsııasy» degen jańa uǵymdardy engizýge;
- joldardy jobalaǵan kezde elektrqýattaý stantsııalaryn ornalastyrý úshin bólek oryndar bólýge;
- elektrqýattaý stantsııalaryn jol boıyndaǵy servıs obektilerine jatqyzýǵa jáne olar úshin jekelegen oryndar belgileýge;
- aýmaqty egjeı-tegjeıli josparlaý jobasynda elektrqýattaý stantsııalaryn ornalastyrý úshin, olardy turǵyn jáne qoǵamdyq aımaqtarda ornalastyrýdy qosa alǵanda, rezervke qoıýǵa;
- jergilikti atqarýshy organdardyń áýejaılarda, vokzaldarda, 1 jáne 2-sanattardaǵy turaqty saýda obektilerinde, saýda bazarlarynda, teatrlarda, tsırkterde, kınoteatrlarda, mádenı-demalys uıymdarynda, sondaı-aq alańdarda, dańǵyldarda, kóshelerde, oramdarda elektrqýattaý stantsııalary bar taksılerdiń turaǵyn uıymdastyrý jáne jabdyqtaý jónindegi fýnktsııalaryn belgileýge;
- erekshe qorǵalatyn aýmaqty josparlaý jobasynda elektr jelilerine qol jetkize alatyn elektrqýattaý stantsııalary bar turaqtar úshin oryndardy ornalastyrýǵa;
- elektromobılderdiń turaǵy úshin arnaıy bólingen oryndardy bólýge;
- elektromobılderdiń ıelerin orynturaq jerinde aqy tóleýden bosatýǵa baǵyttalǵan.
Zańdy ekinshi oqylymda talqylaý kezinde depýtattar qosymsha túzetýler engizdi. Bul turǵyda elektrqýattaý stantsııalaryn ornalastyrý úshin ortaq paıdalanýdaǵy jerlerden ýaqytsha jer paıdalanýǵa jer ýchaskelerin berý, sondaı-aq oblystyń, respýblıkalyq mańyzy bar qalanyń, astananyń jáne aýdannyń ákimdigine elektrqýattaý stantsııalaryn ornalastyrý týraly sheshim qabyldaý jóninde quzyret berý eskerilgen. Munymen qosa, elektr energııasyn qosý, paıdalaný jáne tutyný kezinde elektrqýattaý stantsııalarynyń qaýipsiz jumys isteýi boıynsha talaptardy belgileýge qatysty tolyqtyrý engizildi.
Sondaı-aq depýtattar «Avtomobıl kóligi týraly» jáne «Jol júrisi týraly» zańdaryna tıisti túzetýler engizdi. Onda avtobýstar men trolleıbýstar júrgizýshileriniń jasyn jıyrma úsh jasqa deıin tómendetýdi jáne olar úshin keminde úsh jyl jumys ótilin belgileýdi usyndy, al «D1» kishi sanatyndaǵy júrgizýshiler úshin jumys ótili keminde bir jyldy quraýy tıis.
