Májilis ekonomıkalyq quqyq buzýshylardy qylmystan aryltatyn zańdy qabyldady
ASTANA. KAZINFORM — Búgin Májilistiń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine ekonomıkalyq quqyq buzýshylyqtardy odan ári qylmystyq sıpattan aryltý jáne zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» jáne Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdardy ekinshi oqylymda qabyldady.
«Zań jobalaryn talqylaý barysynda ýákiletti memlekettik organdardyń, atap aıtqanda, Qarjy monıtorıngi agenttiginiń, Ádilet mınıstrliginiń, Bas prokýratýranyń, Joǵarǵy sottyń ókilderimen kelise otyryp, depýtattar Qylmystyq kodekstiń 234 jáne 236-baptary boıynsha qylmystyq jaýaptylyqtyń bastalý shegin ulǵaıtty. Atap aıtqanda, bul baptardy qylmystyq sıpattan aryltý belgili bir jaza úshin jaýapkershilikti jeńildetýdi kózdeıtindikten, biz ol baptar boıynsha sanktsııalardy da qaıta qarastyrdyq. Al, 236-bap boıynsha biz sanktsııalarǵa tıispeı, tek mindetti tárkileýdi alyp tastadyq, óıtkeni baptyń ózinde kedendik bajdardy tóleýden jaltarǵany úshin ǵana jaýaptylyq kózdelgen, ıaǵnı bul jerde tárkilenýge jatatyn zat joq», — dedi zań jobalary týraly baıandaǵan Májilis depýtaty Abzal Quspan.
Onyń atap ótýinshe, Qylmystyq-protsestik kodekstiń 179-babyna redaktsııalyq sıpattaǵy túzetýler engizilip, jańa 3) tarmaqpen tolyqtyrý usynyldy. Onda mazmuny sotqa deıingi tergep-tekserýdiń biryńǵaı tiziliminde isterdi tirkeýdi bolǵyzbaıtyn 3 negizge sáıkes kelmeıtindikten, «Ekonomıkalyq qyzmet salasyndaǵy buzýshylyqtar týraly» degen sózder «salyq jáne bıýdjetke tólenetin basqa da mindetti tólemderdi tóleýden jaltarý faktileri týraly» degen sózdermen aýystyryldy.
«Sondaı-aq, eger adam salyq bereshegin ótegen bolsa, sotqa deıingi tergep-tekserýdiń biryńǵaı tiziliminde ótinishterdi tirkemeý erekshelikterdiń biri retinde kózdelip otyr. Biraq bul ereksheliktiń qylmystyq top quramynda is-áreket jasaǵan adamdarǵa qatysy joq ekenin atap ótkim keledi. Zań jobasynyń búkil mátini boıynsha quqyqtyq olqylyqtardy joıý, zań jobasynyń normalaryn Qazaqstan Respýblıkasynyń zańnamasyna sáıkes keltirý maqsatynda redaktsııalyq, naqtylaý sıpatyndaǵy túzetýler engizildi», — dedi ol.
Májilis depýtattary eki zań jobasyn da qabyldap, Senat qaraýyna jiberdi.
