Májilis ekonomıkalyq baptardy qylmystyq sıpattan aryltý qujatyn maquldady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ekonomıkalyq quqyq buzýshylyqtardy odan ári qylmystyq sıpattan aryltý jáne zańsyz jolmen alynǵan kiristerdi jylystatýǵa jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy men ilespe qujat birinshi oqylymda maquldandy.
«Búgingi zań jobasy Qazaqstanda yńǵaıly bıznes orta qalyptastyrý maqsatynda ázirlendi. Qujat ekonomıkalyq qyzmet salasyndaǵy qylmystar boıynsha jaýapkershilikke tartýdyń ádil tetigin aıqyndaýdy ekonomıkalyq quqyq buzý áreketterin odan ári qylmys sanatynan shyǵarý jolymen júzege asyrý týraly Memleket basshysynyń tapsyrmasyn oryndaý maqsatynda bir top Parlament depýttatarynyń bastamasymen daıyndaldy. Sonymen, usynylyp otyrǵan zań jobasynda Qylmystyq kodekstiń 4 baby qylmys sanatynan shyǵarylyp, Qylmystyq protsestik kodekstiń 1 babyna ózgeris engizilip otyr», - dedi Májilis depýtaty Abzal Quspan.
Atap aıtqanda, tolyqtaı qylmys sanatynan shyǵarýǵa eki bap ushyraıdy, ıaǵnı QK-niń 219-babyn (Kredıtti zańsyz alý nemese bıýdjettik kredıtti maqsatsyz paıdalaný) jáne QK-niń 241-babyn (QR Býhgalterlik esep jáne qarjylyq eseptilik týraly zańnamasyn buzý), ÁQBtK-niń 239-babynyń 6-bóligine kóshire otyryp. Al ishinara qylmystyq sıpattan aryltýda eki bap qamtyldy. Bul turǵyda QK-niń 234-baby eskerilip (Ekonomıkalyq kontrabanda), ÁQBtK-niń 551-babyna kóshirilmek. Sondaı-aq QK-niń 236-baby da (Kedendik bajdardy, kedendik alymdardy, salyqtardy, arnaıy, dempıngke qarsy, ótemaqy bajdaryn tóleýden jaltarý) ishinara qylmystyq sıpattan arylady
«Túzetýler arqyly Ákimshilik quqyq buzýshylyq týraly kodekstiń 551-babynda jaýapkershilikti kózdeı otyryp, iri mólsherde quqyq buzý áreketin jasaýdyń saralaý belgilerin qylmystyq sıpattan arylta otyryp, qylmystyq jaýaptylyqtyń bastalý shegin kóterý usynylady. Demek, qylmystyq jaýapkershiliktiń bastalý shegi asa iri mólsherge deıin kóteriledi. QK-niń 234-baby boıynsha tómengi shegi 10 000-nan 20 000 AEK-ke deıin, QK-niń 236-baby boıynsha 5 000-nan 10 000 AEK-ke deıin kóteriledi», - dedi depýtat.
Munymen qosa, zań jobasynda 2022 jylǵy 13 sáýirdegi №872 «Memlekettik apparattyń qyzmetin bıýrokratııadan aryltý jónindegi sharalar týraly» QR Prezıdenti Jarlyǵyn oryndaý maqsatynda «Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl týraly» Zańyna qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl týraly zańnamanyń maqsattaryn, mindetteri men qaǵıdalaryn belgileý, sonymen birge odan artyq reglamentteýdegi keıbir normalaryn alyp tastaý túzetýlerin eskeredi.
«Zań jobasy praktıkalyq qoldanýdy, halyqaralyq standarttar talaptaryn, FATF usynymdaryn, sondaı-aq tirkelgen qylmystyq ister jáne sotqa jiberilgen ister boıynsha statıstıkalyq derekterdi eskere otyryp, qylmystyq sot isin júrgizýde azamattar men bıznes-qaýymdastyqtardyń quqyqtaryn qorǵaýǵa baǵyttalǵan», - dedi A. Quspan.
Aıta keteıik, Memleket basshysy Qasym-Jomart Toqaev byltyrǵy Joldaýynda ekonomıkalyq sıpattaǵy keıbir zań buzý áreketterin qylmys sanatynan alyp tastaý jumysyn jalǵastyrý qajettigin aıtqan-dy. Prezıdenttiń dál osy tapsyrmasyna oraı ázirlengen zań jobasy Májilistiń qaraýyna tústi. Qujat depýtattar tarapynan búge-shigesine deıin talqylanyp, jan-jaqty súzgiden ótkizilmek. Osy oraıda, Kazinform Májilis depýtaty, Zańnama jáne sot-quqyqtyq reforma komıtetiniń múshesi, zań jobasy avtorlarynyń biri Abzal Quspanmen suhbattasqan bolatyn.
