Májilis ekologııa máseleleri boıynsha zań jobasyn maquldady
ASTANA. KAZINFORM – Májilis depýtattary ekologııalyq máseleler boıynsha ózgerister men tolyqtyrýlar engizýdi kózdeıtin zań jobasyn birinshi oqylymda maquldady.
Zań jobasy ekologııa salasyn tsıfrlandyrýǵa, qorshaǵan ortanyń jaı-kúıi men tabıǵı resýrstar týraly biryńǵaı aqparattyq júıeni qalyptastyrýǵa baǵyttalǵan. Májilis depýtaty Edil Jańbyrshın baıandamasynda usynylǵan túzetýlerdi jeti negizgi blok boıynsha tanystyrdy.
Derekterdi tsıfrlandyrý
Qoldanystaǵy Ekologııalyq kodekste qarastyrylǵan ulttyq derekter bankin jetildirý usynylady. Buǵan deıin aqparattyń shashyrańqylyǵy men qaıtalanatyn protsester máselesi bolǵan.
Endi barlyq derekter biryńǵaı júıege shoǵyrlandyrylyp, negizgi kadastrlar men tizilimder sonyń quramyna engiziledi. Sondaı-aq emıssııalardy avtomatty baqylaý júıeleri men óndiristik ekologııalyq eseptilik mindetti túrde osy bazaǵa túsedi.
Bul bıýrokratııany azaıtyp, málimetterdi burmalaýdyń aldyn alýǵa múmkindik beredi.
Kómirtektik ofsetter jáne klımattyq turaqtylyq
Parıj kelisimi aıasyndaǵy mindettemelerdi oryndaý úshin kómirtekti sińirý kólemin arttyrý kózdeledi. Zań jobasy orman jáne jaıylym kómirtektik ofsetterin engizedi.
Investorlar orman otyrǵyzý jobalaryna qatysyp, alynǵan kómirtek birlikterin naryqta sata alady. Bul tetik jeke ınvestıtsııa tartýǵa jáne eldegi orman alqabyn ulǵaıtýǵa baǵyttalǵan.
Qaldyqtardy basqarý
Zańsyz qoqys oryndaryn joıý jaýapkershiligin jergilikti atqarýshy organdarǵa berý usynylady.
Sonymen qatar qatty turmystyq qaldyqtarǵa arnalǵan tarıfterdi belgileý quzyreti de óńirlerge beriledi. Bul jergilikti erekshelikterdi eskerýge jáne salanyń tıimdiligin arttyrýǵa múmkindik beredi.
«Qazgıdromet» qyzmetin reformalaý
Qazirgi kezde kásiporyn qyzmetiniń basym bóligi memlekettik monopolııaǵa jatady. Jańa túzetýlerge sáıkes tek strategııalyq jáne qaýipsizdikke qatysty qyzmetter ǵana monopolııada qalady.
Al ǵylymı zertteýler men arnaıy aqparat berý básekeli ortaǵa shyǵarylady. Bul bıýdjetke túsetin júktemeni azaıtyp, qosymsha tabys tabýǵa jol ashady.
Artyq shyǵaryndylar úshin jaýapkershilik
Aıyppul esepteý kezeńi naqty aıqyndalmaǵandyqtan, kásiporyndar ony sotta daýlaýǵa múmkindik alǵan.
Endi normadan tys shyǵaryndylar kezeńi sońǵy ekologııalyq baqylaýdan bastap esepteledi. Bul quqyqtyq olqylyqtardy joıady.
Qaıta óńdeýshilerdi qoldaý
Eger óndirýshiler óniminde keminde 30% qaıta óńdelgen shıkizat qoldansa, olar keńeıtilgen mindettemeler talaptarynan bosatylýy múmkin.
Bul otandyq qaıta óńdeý salasyn damytýǵa jáne aınalym ekonomıkasyn qalyptastyrýǵa yqpal etedi.
«Jasyl» qarjylandyrý jáne saqtandyrý
«Jasyl» jobalarǵa qatysty retteý jeńildetilip, qaıtalanatyn normalar alynyp tastalady.
Sondaı-aq ekologııalyq saqtandyrý júıesinde naqty mindetter engizilip, zalaldy óteý jáne táýekelderdiń aldyn alý tetikteri kúsheıtiledi.
Buǵan deıin Qazaqstan qaldyqtardy basqarý baǵytynda 99-orynda turǵanyn jazǵanbyz.
