Májilis depýtattyǵynan ketken Shúkijanova qaı salada qyzmet etetini belgili boldy
ASTANA. KAZINFORM – Búgin Parlament Májilisiniń jalpy otyrysynda depýtat Dınara Shúkijanovanyń ókilettigi merziminen buryn toqtatyldy.
«Parlament Májilisiniń depýtaty Dınara Amanjelqyzy Shúkijanova mindetterin atqarýdan óz erkimen bosatý týraly ótinish berdi. Osyǵan oraı, Ortalyq saılaý komıssııasy sizderdiń nazarlaryńyzǵa Konstıtýtsııanyń 52-babyna, «Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýtsııalyq Zańnyń 24-baby 3 jáne 8-tarmaqtaryna sáıkes, Májilis depýtaty D. Shúkijanovanyń ótinish berýine baılanysty onyń ókilettiligin merziminen buryn toqtatý týraly máseleni sheshý úshin usynym engizip otyr», - dedi Ortalyq saılaý komıssııasynyń múshesi Shavhat Ótemisov.
Jalpy otyrysta palata depýtattary atalǵan usynymǵa daýys berip, D. Shúkijanovanyń ókilettigin merziminen buryn toqtatý týraly sheshim qabyldady.
«Májiliske kelgenge deıin depýtattarǵa qandaı orasan zor jumys pen jaýapkershilik júkteletinin bilmedim. Men Respublica partııasynyń teń tóraǵasy bolyp qala beremin jáne halyq pen bıznestiń múddesin qorǵaýdy jalǵastyramyn. Óńirdegi óndiriske oralyp jatyrmyn. Bul rette, elimizdiń ekonomıkasyna odan ári paıda ákeletinime senemin», - dedi Dınara Amanjelqyzy.
