Májilis depýtattary Oralda úıi sýǵa ketken turǵyndardyń ótinish-tilegine qulaq túrdi
ORAL. KAZINFORM — Májilis depýtattary Edil Jańbyrshın, Nartaı Sársenǵalıev, Rınat Zaıytov jáne Abzal Quspan Oral qalasynda tasqyn sýǵa qarsy kúres barysymen tanysty.
Depýtattar aldymen oblystyq jedel shtabqa at basyn burdy. Onda oblys ákiminiń orynbasary Qalııar Aıtmuhambetov qazirgi jaǵdaımen tanystyrdy.
Onyń sózine qaraǵanda, Orynborda sý deńgeıi joǵary shegine jetti. Ol sý Oralǵa 5-6 kúnde keledi dep boljanyp otyr. Sondyqtan Jaıyq ózeni boıynda ornalasqan 84 eldi meken men Oral qalasynda budan on kún buryn bógetterdi bekitý jumystary bastaldy.
«Bógetterdi kóterýge 300-den astam tehnıka tartyldy. Oǵan qosa Úkimet sheshimimen Almaty qalasy men oblysynan, Túrkistan, Qyzylorda, Qaraǵandy, Pavlodar, Aqtóbe, Qostanaıdan jalpy sany 750 tehnıka kelýi kerek. Bul tehnıkalar tórt aýdan men Oral qalasyna bólinedi. Olardyń aldy jumysqa kirisip ketti. Bógetter tasqyn kezinde úsh-tórt kúnge shydaýy kerek. Sol sebepti onyń bıiktigin de, enin de úlkeıtip jatyrmyz. Mamandardyń boljamyna qaraǵanda, sý deńgeıi 970-980 santımetrge (qaýipti shegi – 850 sm) jetýi yqtımal. Osynyń bárin eskere otyryp, bógetterdiń bıiktigin 12-13 metrge deıin jetkizbekshimiz. Ózge óńirlerden QR TJ mınıstrliginen – 626, QR Qorǵanys mınıstrliginen – 568, Ulttyq ulannan 836 sarbaz keldi. Ózimizdiń kúshterdi qosqanda, 5 553 adam jumys istep jatyr, - dedi Q.Aıtmuhambetov.
Májilismender Zachagan kenti Komıntern aýylynda Jaıyq jaǵalaýyn bekitý jumystarymen tanysqannan keıin qaladaǵy servıs jáne jańa tehnologııalar kolledjiniń jataqhanasynda ornalasqan turǵyndarmen kezdesti.
Kolledj dırektory Almagúl Qydyrǵojınanyń aıtýynsha, jataqhanadaǵy evakýatsııalyq pýnkt 100 orynǵa eseptelse, munda 95 adam turyp jatyr.
«Kolledj stýdentteri qashyqtan oqýǵa jiberildi. Turǵyndar otbasylarymen bólmelerde turyp jatyr. Olarǵa ákelingen daıyn tamaqty taratyp beremiz. Sondaı-aq medıtsınalyq pýnktte dáriger, medbıkeler kezekshilik etedi», - dedi A.Qydyrǵojına.
Altynbaı Amanǵalıev Jaıyq ózeni jaıylmasynda ornalasqan «Nurly jol» baý-baqsha seriktestiginde turǵan eken.
«9 sáýir kúni tasqyn sý bógetti buzyp ketti. Sodan aldymen oblystyq joǵary sporttyq sheberligi mektebi ǵımaratyna keldik. Olarǵa da rızamyz. Otbasymda bes adam bar. Búgin kolledj jataqhanasyna ornalasyp jatyrmyz. Jaǵdaıymyz jasalǵan, bári jetkilikti, tek endi sý ketkennen keıin úıimizdi qalpyna keltirýge kómektesse deımiz», - dedi A.Amanǵalıev.
Buǵan qatysty Májilis depýtaty Abzal Quspan saıajaı úıleriniń máselesi bólek qarastyrylýy kerektigin atap ótti.
«Eger saıajaı úılerin qaıtadan sýǵa ketetin jerlerge, ıaǵnı ózen jaıylmalaryna salynsa, onda qarjy jelge ushýy múmkin. Munyń ámbebap sheshimi joq ázirge, oılastyrý kerek. Boljamdarǵa qaraǵanda, aldaǵy ýaqytta sý tasqyny jıileıdi. Álemde jylyný úrdisi júrip jatyr, Reseı tarapy sýdy ustap tura almaımyz dep aıtyp jatyr. Biraq qalaı bolǵanda da, Prezıdent málim etkenindeı, eshkim kómeksiz qalmaıdy. Biz áli osynda bolamyz. Komıssııalar mindetti túrde depýtattardyń qatysýymen máselelerdi sheshýi kerek», - dedi A.Quspan.
Sondaı-aq Májilis depýtaty Edil Jańbyrshın shyǵynǵa ushyraǵan aýyl sharýashylyǵy maldaryna qatysty zalaldy óteý tetigi de zańdastyrylyp jatqanyn jetkizdi. Májilismender «AMANAT» partııasy BQO fılıaly ǵımaratynda saıajaı turǵyndarymen kezdesip, olardyń talap-tilekterine qulaq túrdi.
Jıynda saıajaı máselelerin zańnamalyq turǵydan sheshý qajettigi aıtyldy. Mysaly, saıajaı úılerin tek maýsymdyq baǵytta paıdalanyp, ony kúz túse, barlyq kommýnıkatsııadan (gaz, elektr qýaty) aıyryp tastaǵan jaǵdaıda, onyń ekinshi ushy bar. ıAǵnı, onda basqa turǵyn úıi joq adamdar qaıda barady, sonymen qatar baý-baqsha seriktestigi tóraǵalarynyń mindetterin zańdastyrý kerektigi de sóz boldy.
Eske sala keteıik, budan buryn sý tasqynyna baılanysty Oral qalasyndaǵy mektepter qashyqtan bilim berýge kóshetinin jazǵan bolatynbyz.
