Májilis depýtattary medıtsına salasynda qalyptasqan ózekti máselelerdi ortaǵa saldy
Búgin Májilistiń Áleýmettik-mádenı damý komıteti Astana medıtsına ýnıversıtetinde otyrys ótkizdi. Jıynǵa komıtet tóraǵasy Ashat Aımaǵambetov jetekshilik etip, oǵan medıtsına salasynyń mamandary qatysty, dep habarlaıdy QazAqparat QR Parlamenti Májilisiniń baspasóz qyzmetine silteme jasap.
Otyrysty ashqan Ashat Aımaǵambetov2023 jylǵy 9 qazanda Májiliste Mindetti áleýmettik medıtsınalyq saqtandyrý júıesiniń problemalary men damý perspektıvalary boıynsha Úkimet saǵaty ótetin aıtty. Úkimet saǵatyn daıyndaý aıasynda komıtet depýtattary elimizdiń, sonyń ishinde Astana qalasynyń medıtsına uıymdarynyń jumysymen tyǵyz baılanys ornatyp, problemalyq máselelermen keńinen tanysyp jatqanyna nazar aýdardy.
Memleket basshysy Qasym-Jomart Toqaev byltyrǵy Joldaýynda densaýlyq saqtaý júıesin jetildirýge erekshe mán bergen bolatyn. Osyǵan baılanysty asa mańyzdy máselelerdi retke keltirýge basa nazar aýdaryp otyrmyz. Barlyq densaýlyq saqtaý uıymdarynyń problemalary uqsas. Bul medıtsınalyq qyzmetter kórsetýdi qarjylandyrýdyń jetkiliksizdigi men medıtsınalyq uıymdardyń kredıtorlyq bereshegi, – dedi Ashat Aımaǵambetov.
Jıyn barysynda depýtattar medıtsınalyq qyzmetterge tarıfterdiń naqty jaǵdaıdan, kommýnaldyq qyzmetterge, dári-dármekterge, taýarlarǵa jáne basqa da baǵalardyń ósýinen artta qalýyna mán berdi. Sonymen qatar medıtsınalyq qyzmet kólemin sapasyz josparlaý men birqatar medıtsınalyq qyzmetterge syzyqtyq shkalany negizsiz qoldaný máselesine toqtaldy.
Sondaı-aq aqparattyq júıelerdi basqarýdaǵy jáne olardyń arasyndaǵy ıntegratsııanyń bolmaýyna baılanysty qıyndyqtarǵa, azamattarmen medıtsınalyq qyzmet alý kezeginiń ósýine qatysty máselelerdi talqylady.
Densaýlyq saqtaý mınıstrligi biraz máseleni sheship jatqanyn bilemiz. Nátıje bar. Búgingi kezdesýdiń maqsaty – máselelerdi talqylap birlesken sheshimderder ázirleý, – dedi Ashat Aımaǵambetov.
Aıta ketý kerek, jıynǵa Májilis depýtattary Juldyz Súleımenova, Gúldara Nurymova, Núrgúl Taý, Dáýlet Muqaev, Aına Mysyrálimova jáne Densaýlyq saqtaý mınıstrligi men Medıtsınalyq saqtandyrý qorynyń ókilderi qatysty.
