Májilis depýtattary Qyzylordadaǵy mektepterdiń jóndeý jumystary men qurylysyn tekserdi
QYZYLORDA. KAZINFORM – Májilis depýtattary, «AMANAT» partııasy fraktsııasynyń músheleri Marhabat Jaıymbetov pen Murat Ergeshbaev Qyzylorda qalasy Mereı shaǵyn aýdanyndaǵy №211 orta mektepte júrgizilip jatqan kúrdeli jóndeý jumystarymen tanysty.
Búginde Qyzylorda oblysynda 300-den astam mektep bar. Aldaǵy oqý jylynda óńirde 17 myńnan astam bala birinshi synypqa barady. Marhabat Jaıymbetov pen Murat Ergeshbaev Qyzylorda qalasyndaǵy jańa oqý jylyna daıyndyq barysyn tekserdi. Olar Mereı shaǵyn aýdanyndaǵy №211 orta mektepke bardy.
Mektep dırektory Aıjan Álimovanyń aıtýynsha, mekteptiń irgetasy 1989 jyly qalanǵan, qazir munda 860 oqýshy bilim alady. 35 jyldyq tarıhy bar bilim ordasyna «AMANAT» partııasynyń oblystyq saılaýaldy baǵdarlamasy aıasynda kúrdeli jóndeý júrip jatyr.
– Merdigerler kestege saı qatań tártippen jumys istep jatyr. Kúrdeli jóndeýdiń ózi mamyr aıynda bastaldy, qarjylandyrýǵa nemese qurylys materıaldaryn satyp alýǵa esh kedergi joq. Jobanyń jalpy quny shamamen 365 mıllıon teńgeni quraıdy. Syrtqy qaptaý jumystary aıaqtalyp, terezeler men shamdar aýystyryldy. Ústińgi qabattarǵa jańa radıatorlar ornatylyp, taqtaıshalar tóseldi. Qazir qurylysshylar aýlany jabdyqtap, tas tósep, sporttyq qural-jabdyqtar ornatyp jatyr. Sonymen qatar mektep jıhazdary men oqý qural-jabdyqtary tolyǵymen jańartylady, – dedi mektep dırektory.
Ótken jyly oblys ortalyǵyndaǵy tórt mektepte oryn tapshylyǵy bolyp, qosymsha ǵımarattar salyndy. Sondaı-aq bıyl jyl basynda 1170 oryndyq tórt mektep pen 550 oryndyq eki mektep paıdalanýǵa berildi.
«Jaıly mektep» jalpyulttyq jobasy men «AMANAT» partııasynyń saılaýaldy baǵdarlamasy aıasynda búginde oblysta 12300 oryndyq 21 mektep salý josparlanǵan. Al 6900 oryndyq 10 mektep salynyp jatyr. Qalǵan mektepter 2025 jyly paıdalanýǵa beriledi. Bul sharalar oblystaǵy apatty jáne artyq júktememen jumys istep turǵan mektepterdiń máselesin tolyǵymen sheshedi. Sonymen qatar oblysta bilim berý ınfraqurylymyn qoldaý qory esebinen 400 oryndyq fızıka-matematıka mektep-ınternaty men Shıeli aýdanynda 100 oryndyq mektep salynyp jatyr.
– Bilim sapasy men mektepterdiń qoljetimdiligi árqashan ózekti. Sondyqtan partııamyzdyń «Halyqpen birge!» saılaýaldy baǵdarlamasynda oqýshylarǵa jaıly oryndar qurý, jańa mektepter men balabaqshalar salý, shyǵarmashylyq jáne sporttyq sektsııalar ashýdy qarastyrdyq. 2025 jyly oblysta birde-bir qaýipti mektep bolmaýy kerek. Bul – Memleket basshysynyń tikeleı tapsyrmasy. Balalardyń qaýipsizdigine, dabyl túımeleri men beınebaqylaý kameralaryn ornatýǵa erekshe nazar aýdarý kerek, – dedi depýtat Marhabat Jaıymbetov.
