Májilis depýtattary Atyraýda shekara qaýipsizdigi máselesin kóterdi
ATYRAÝ. KAZINFORM — Májilis depýtaty Baqtyqoja Іzmuhambetov Atyraý qalasy Damby aýylynda ornalasqan Ulttyq qaýipsizdik komıteti Shekara qyzmetiniń Atyraý oblystyq departamentine qarasty Jaǵalaý kúzeti dıvızıonynyń jeke quramymen kezdesti. Bul týraly Májilistiń baspasóz qyzmeti málimdedi.
Kezdesýge Májilis depýtaty Abzal Quspan, oblystyq ardagerler keńesiniń tóraǵasy Murat Óteshov, «AMANAT» partııasy Atyraý oblystyq fılıalynyń tóraǵasy Abdolla Idresov jáne oblystyq máslıhat depýtaty Jeńis Ábilqares qatysty.
Basqosý barysynda memlekettik shekara kúzetinde turǵan bólimsheniń materıaldyq-tehnıkalyq jaǵdaıy talqylandy. Atap aıtqanda, Jaǵalaý kúzeti paıdalanatyn ákimshilik-turmystyq ǵımarat 1980 jyly salynǵan burynǵy balabaqsha ǵımaraty ekeni, tehnıkalyq qorytyndy boıynsha nysan apattyq jaǵdaıda turǵany aıtyldy. Ǵımarat qoldanysqa berilgennen beri jóndeý jumysy júrgizilmegenine, jaýyn-shashyn kúnderi tóbesinen sý aǵyp, paıdalanýǵa jaramsyz kúıge túskenine nazar aýdaryldy.
Kezdesýde Májilis depýtaty Baqtyqoja Іzmuhambetov áskerı qyzmettiń máni men mańyzyna toqtaldy.
— Memleket basshysy jýyrda «Turkistan» gazetine bergen suhbatynda áskerı qyzmettiń abyroı-bedelin kóterý jáne elimizdiń qorǵanys qabiletin arttyrý — memlekettiń basty basymdyǵynyń biri ekenin aıtty. Prezıdent atap ótkendeı, «Sarbaz bolý — ózińdi damytý úshin tyń múmkindikterge ıe bolý degen sóz. Otan qorǵaý — elimizdiń ár azamatynyń eń qasterli boryshy. Memleket qaýipsizdigin, el men jer tutastyǵyn qamtamasyz etý — barshaǵa ortaq mindet. Sondyqtan jastar qaýymy sapaly áskerı daıarlyqtan ótýge tıis. Biz buǵan erekshekóńil bólip kelemiz. Áskerdegi tártip máselesin jiti qadaǵalaımyz. Áskerı qyzmetshilerdiń áleýmettik jaǵdaıy da nazardan tys qalmaıdy, — dedi ol.
Aıta keteıik, 2024 jyly Baqtyqoja Іzmuhambetov osy mekeme ujymymen kezdesýótkizip, birqatar máselelerdi kótergen bolatyn. Sonyń nátıjesinde dıvızıondaǵy kólik turaǵy jańǵyrtylyp, qaıta salyndy. Bıyl quny 17 mln teńgeni quraıtyn jóndeý jumysyn bastaý josparlanyp otyr.
Kezdesý barysynda QR UQK Shekara qyzmeti Atyraý oblystyq departamentiniń Jaǵalaý kúzeti dıvızıonynyń komandıri Farhad Mırmanovmekemede júzege asyrylyp jatqan jobalar týraly baıandady, sheshimin kútken túıtkildi máselelerge toqtaldy.
Óz kezeginde Baqtyqoja Іzmuhambetov kóterilgen máseleler sheshimin tabýy úshin ýákiletti memlekettik organdarmen birlesip, tıisti jumys júrgiziletinin atap ótti.
Eske sala keteıik, buǵan deıin Almatydaǵy áleýmettik nysandar men turǵyndardyń máselesin Májilis depýtattary nazarǵa alǵanyn jazǵan edik.