Májilis depýtattary Almatydaǵy emhana qyzmetkerleriniń ótinishterine nazar aýdardy
ALMATY. KAZINFORM - Májilis depýtattary Nurgúl Taý, Rınat Zaıtov, Irına Smırnova jáne Gaýhar Tanasheva Almaty qalalyq kardıologııa ortalyǵy men Aqsaı balalar ortalyǵy ujymdarymen kezdesti.
Májilis depýtattary S.D. Asfendııarov atyndaǵy Qazaq ulttyq medıtsına ýnıversıtetiniń quramyna kiretin Aqsaı balalar ortalyǵyna bardy. Bul 70 jyldyq tarıhy bar eń baıyrǵy kópsalaly balalar emdeý-dıagnostıkalyq mekemeleriniń biri. Munda jyl saıyn respýblıkanyń túkpir-túkpirinen 7 myńnan astam bala medıtsınalyq kómek alady, 1500-den astam ota jasalady, 30 myń konsýltatsııalyq jumys júrgiziledi.
Sońǵy jyldary klınıkanyń tehnıkalyq bazasy jańǵyrtylyp, keıbir medıtsınalyq jabdyqtar ishinara jańartyldy, mamandar shetelde biliktiligin arttyryp, halyqaralyq deńgeıde iri medıtsınalyq ortalyqtarmen yntymaqtastyq jolǵa qoıyldy.
Alaıda sheshimin tappaı turǵan ózekti másele – Keńes zamanynan qalǵan eski ǵımarat. Qazirgi ýaqytta ǵımarat qyzmetkerlerdiń kútiminiń arqasynda tur, biraq kúrdeli jóndeýdi qajet etedi.
– Bul jerde joǵary bilikti mamandar jumys isteıdi, bilikti hırýrgtar kúrdeli operatsııalar jasaıdy. Biz bul emhanany jóndeýge qarjy bólý týraly máseleni kóteremiz, – dedi Respublica fraktsııasynyń múshesi, Májilis depýtaty Nurgúl Taý.
Al, depýtattardyń qalalyq kardıologııa ortalyǵyna at basyn burýyna ondaǵy medıtsına qyzmetkerlerin jumystan shyǵarýǵa baılanysty ujymdyq ótinish sebep boldy.
Ortalyqtyń bas dırektory Roza Qýanyshbekovanyń aıtýynsha, mekemeniń qomaqty debıtorlyq bereshegi bolǵan. Alaıda qazir jaǵdaı ózgerip, Ortalyq tabys tabý múmkindigine ıe boldy. Sonymen qatar jańa tásilder men tehnologııalar, emdeý ádisteri engizilýde, medıtsınalyq qyzmetterdiń túrleri keńeıtilýde.
Basshylyqtyń pikirinshe, jańa talaptarmen kelispeıtinder jumystan ketken, kópshiligi basqa jumysqa erikti túrde aýysqan.
Depýtattar ortalyqtyń jumysymen keńinen tanysyp, jaǵdaıdy egjeı-tegjeıli zerdeleý úshin ortalyq basshylyǵynan qosymsha aqparattar aldy. Qazaqstan Halyqtyq partııasynan saılanǵan Májilis depýtaty Gaýhar Tanasheva atap ótkendeı, saılaýshylardyń birde-bir ótinishi nazardan tys qalmaıdy jáne qyzmetkerler zańsyz jumystan shyǵarylǵan jaǵdaıda mindetti túrde tıisti sharalar qabyldanatyn bolady.
