Májilis depýtattary Aqsý qalasyndaǵy óndiris nysandarynda boldy
ASTANA. KAZINFORM – «Aq jol» partııasynyń Májilistegi depýtattary Azat Perýashev pen Erlan Barlybaev Pavlodar oblysyna jumys sapary aıasynda Aqsý qalasyndaǵy GRES pen ferrosplav zaýytyna bardy. Olar óndiris orny men jańǵyrtý jumystarynyń barysymen tanysty.
Qazirgi ýaqytta Aqsý GRES-inde jetinshi energoblokty qaıta qurý júrgizilýde. Elektr stantsııasy osy maqsatta jańa týrbına men generatorlyq qondyrǵy alǵan. Jańǵyrtý nátıjesinde bloktyń qýaty 300 MVt-tan 325 MVt-qa deıin ulǵaımaq. Bul jumystar qoldanystaǵy menshik ıeleriniń jeke ınvestıtsııalary esebinen júzege asyrylyp jatyr.
Aqsý GRES-inde kelesi kezeń retinde sońǵy, segizinshi energoblokty jańǵyrtý josparlanǵan. Bul jumystar aıaqtalǵannan keıin stantsııanyń jalpy qýaty 2400-den 2800 MVt-qa deıin ósedi. Bul óndiris nysandaryn elektrmen qamtamasyz etýde qosymsha múmkindikter týdyryp, óńirdegi ónerkásip kólemin ulǵaıtýǵa jol ashady.
Stantsııa basshylyǵy depýtattarmen kezdesýde kadr daıyndaý máselesin de kóterdi. Qazir kásiporynda jumys kúshi jasaryp keledi. Qyzmetkerlerdiń ortasha jasy 41 jasta. Ortasha jalaqy — 650 myń teńge. Bul kolledj túlekterin, ásirese Aqsý men jaqyn óńirlerden, jumysqa tartýǵa múmkindik beredi. Alaıda, joǵary bilikti ınjenerlik-tehnıkalyq mamandarǵa suranys áli de joǵary. Al olardy daıarlaý — júıeli jáne ýaqytty qajet etetin protsess.
Aqsý ferrosplav zaýyty metallýrgııalyq óndiris úshin qajetti túrli ferrosplav túrlerin shyǵarady. Qazirgi tańda kásiporynda altynshy tsehtaǵy peshti jańartý jumystary júrgizilýde. Jospar boıynsha óndiris kezeń-kezeńimen jabyq tıptegi, joǵary energııa tıimdiligi bar jáne ekologııaǵa zııany az peshterge tolyq kóshpek.
— Qyzmetkerlerdiń aıtýynsha, qazirgi ashyq peshterdiń ornyna germetıkalyq (jabyq) peshter ornatylsa, eńbek jaǵdaıy áldeqaıda jaıly bolady. Jastar jumysyna rıza. Mysaly, 6-tsehta jumys isteıtin balqytýshy — jergilikti jigit, ol Aqsý qara metallýrgııa kolledjin bitirgen. 20 jasynan beri osy kásiporynda eńbek etip keledi, qazir 35 jasta. Aı saıyn 900 myń teńge jalaqy alady, — dedi Azat Perýashev.
Kásiporyn basshylyǵynyń aıtýynsha, «55+» baǵdarlamasynyń nátıjesinde tájirıbeli kadrlardyń bir bóligi zeınetke shyqqan. Bul baǵdarlama zııandy jáne qaýipti óndiriste uzaq jyl eńbek etken jumysshylarǵa erterek zeınetke shyǵýǵa múmkindik beredi.
Osyǵan baılanysty kompanııa bilikti mamandardy daıarlaýǵa erekshe kóńil bólip, olardy joǵary jalaqymen yntalandyrý arqyly ujymda turaqtylyq saqtaýǵa tyrysyp jatyr.
Aıta ketelik depýtat Túrkistandaǵy «Saýran» klýbynyń parasportshylarymen kezdesken edi.