Májilis depýtaty Jol qoryn qurýdy usyndy
ASTANA. KAZINFORM — Májilistiń jalpy otyrysynda Premer-mınıstrdiń atyna saýal joldaǵan depýtat Oljas Quspekov Jol qoryn qurýdy usyndy.
— Jyl saıyn Qazaqstan joldarynda adamdar qaza tabady. Bul — jaı ǵana qurǵaq statıstıka emes, respýblıkalyq tas joldardyń jaı-kúıi men kútimi azamattardyń qaýipsizdigine jáne el ekonomıkasynyń turaqtylyǵyna tikeleı áser etetinin kórsetetin júıeli belgi. Tek ótken jyldyń ózinde 36 myńnan astam jol-kólik oqıǵasy oryn aldy. Bul bir jyl burynǵymen salystyrǵanda 14 paıyzǵa kóp. 51 myńnan astam adam zardap shegip, 2,5 myńǵa jýyq azamatymyz qaza tapty. Bul rette eń aýyr apattar dál osy qala syrtyndaǵy tas joldarda oryn alyp jatyr. Al ol jerdegi ınfraqurylym barynsha sapaly ári boljamdy bolýy tıis, — dedi depýtat.
Onyń dereginshe, avtojol salasynyń jyl saıynǵy qajettiligi shamamen 1,9 trln teńge dep baǵalansa, naqty qarjylandyrý shamamen 1 trln teńgeni quraıdy. Jalpy paıdalanymdaǵy avtomobıl joldaryn jóndeý men kútip ustaýǵa respýblıkalyq bıýdjetten jyl saıyn shamamen 44 mlrd teńge bólinedi. Bul qazirgi júktemeni jáne tozý qarqynyn jaba almaıdy.
— Osyǵan baılanysty Qazaqstanǵa ashyq, turaqty jáne uzaq merzimge jumys isteıtin Jol qory qajet. Mundaı tetik respýblıkalyq joldardy salý, kútip ustaý jáne jańǵyrtý úshin turaqty qarjylandyrýdy qamtamasyz etýge múmkindik beredi. Qordy tolyqtyrý kózderi retinde aqyly joldar, tranzıttik alymdardy, joldardyń aqyly ýchaskelerin damytý, jol boıy servısteri jáne ózge de salyqtyq emes túsimder, sondaı-aq kólik quraldarynyń áınekterin qarańǵylaýǵa aqyly ruqsat berý tetikterin paıdalanýǵa bolar edi, — dedi ol.
Osyǵan oraı Oljas Quspekov Úkimetten mynadaı usynystardy qaraýdy ótindi:
— Qazaqstana Respýblıkasynyń Jol qoryn qurý máselesin qarastyrý;
— aqy alý quraldary men salyqtyq emes túsimderdi qosa alǵanda atalǵan qordy tolyqtyrýdyń turaqty kózderin aıqyndaý;
— Zańnamaǵa tıisti ózgerister engizý boıynsha usynystar ázirleý.
Buǵan deıin Atyraý–Oral joly I tehnıkalyq sanatqa qashan aýystyrylýy múmkin ekenin jazǵan edik.