Májilis depýtaty ıAk-40 ushaqtaryn Qazaqstan aýmaǵynda qoldanýǵa tyıym salýdy usyndy

- Qazaqstan aýmaǵynda 1981 jyly óndirisi toqtatylǵan ıAk-40 jolaýshy ushaqtary qazirge deıin paıdalanylyp júr. Olardyń «jasy» 44-ten 55-ke deıin jetip otyr. Bul álemdegi áýe parkiniń ortasha shekti jasynan 2 ese eski degen sóz. Shekti jas 15-20 jyldan aspaý kerek. ıAk-40 ushaqtarynyń resýrsy taýsylǵan. Óıtkeni ótken ǵasyrdyń 60 jyldary jasalǵan, AI-25 qozǵaltqyshtarymen jabdyqtalǵan. Bul qozǵaltqyshtar 1980 jyldardyń aıaǵynan beri shyǵarylmaıdy. 2022 jyly «Motor Sıch» kásiporny qıraýǵa ushyrady. Osylaısha AI-25 qozǵaltqyshtary men olarǵa arnalǵan sertıfıkattalǵan qosalqy bólshekter óndirilmeıdi. Al halyqaralyq jetkizilim múlde joq. ıAk-40 ushaqtary Halyqaralyq azamattyq avıatsııa uıymynyń zamanaýı talaptaryna sáıkes kelmeıdi. Mundaı ushaqtardy paıdalanýǵa Eýropa odaǵy aýmaǵynda 2002 jyldyń 1 sáýirinen bastap tyıym salynǵan. Alaıda elimizde qaýipsizdik standarttaryna saı kelmeıtin ıAk-40 sanıtarlyq avıatsııa qyzmetinde naýqastardy tasymaldap júr. Bul adam ómirine qaýip tóndiredi emes pe, - dedi depýtat.

Sondaı-aq, ol el zańnamasynda jolaýshy tasymalynda adam qaýipsizdigi basty qaǵıdat ekenin eske saldy.

- Qazaqstan aýmaǵynda bul ushaqtardy odan ári paıdalanýdy toqtatýdy usynamyz. Osy jyldyń sońyna deıin ıAk-40 áýe kemelerin kezeń-kezeńimen paıdalanýdan shyǵarýdyń kestesin usynyńyzdar. Eskirgen áýe kemelerin halyqaralyq standarttarǵa saı keletin zamanaýı áýe kemelerimen almastyrý baǵdarlamasyn ázirlep, bekitý qajet, - dedi Temir Qyryqbaev.

Buǵan deıin Bangkoktan Qazaqstanǵa jańa áýe baǵyty iske qosylatynyn jazǵan edik.