Májilis depýtaty Ulttyq quryltaıda bilim salasyna qatysty birneshe másele kótermek
QYZYLORDA. KAZINFORM – Ulttyq quryltaı – memleketimizdiń damýyna ózek bolar eń mańyzdy taqyryptar talqylanatyn alqaly jıyn. Bul týraly Qyzylorda qalasyndaǵy V Ulttyq quryltaı aıasynda ótip jatqan sektsııalyq otyrys kýlýarynda QR Parlamenti Májilisiniń depýtaty, Ulttyq quryltaı múshesi Samat Nurtaza aıtty.
Ol, eń aldymen, Syr óńiri týraly áserimen bólisti.
- Maǵan qalanyń tazalyǵy unady. Turǵyndardyń týǵan jerdi taza ustaýǵa beıimdelgeni kórinip-aq tur. Syr óńirine buǵan deıin de kelip júrmin. Ol ýaqytta qaladaǵy áýejaı qurylysy júrip, jańa termınal salynyp jatqan. Al keshe ushaqtan túsken bette jańa kelbetke engen áýejaıdy kórip, rıza boldym. Ondaǵy qyzmet sapasy qonaqtardyń barlyǵyna unaǵandaı, - dedi Samat Nurtaza.
Depýtat Ulttyq quryltaıda qandaı másele kóteretini týraly da aıtty.
- Óz tarapymnan bilim salasyna qatysty birneshe másele bar. Ásirese, mekteptegi psıholog mamandarǵa qatysty aıtqym keledi. Sebebi búginge deıin muǵalimderdiń jalaqysy óskenimen olar bul qoldaýdan qalys qalyp júr. Jıynda mektep oqýlyqtaryna qatysty máseleler de kóteriledi, - dedi ol.
Eske salsaq, Ulttyq quryltaı aıasynda ótken Bilim-ǵylym sektsııasynda Ǵylym jáne joǵary bilim mınıstri Saıasat Nurbek elimizde bilim berý, zertteý jáne qoldanbaly tásilderdi biriktiretin AI-Sana baǵdarlamasy bıyl da jalǵasatynyn málimdedi.
