Májilis depýtaty Túrkistandaǵy «Saýran» klýbynyń parasportshylarymen kezdesti
TÚRKІSTAN. KAZINFORM – Májilis depýtaty, Qazaqstan Halyq fraktsııasynyń múshesi Kenjeǵul Seıtjan Túrkistan oblysynda jumys saparymen júr. Májilis depýtaty múgedektigi bar jandarǵa arnalǵan «Saýran» sport klýbynyń jumysymen tanysty.
Depýtat «Saýran» sport klýbynyń ujymymen kezdesip, uıymnyń ishki jumysy jáne jetistikterimen tanysty. Klýb basshysy Abaı Qazıev múmkindigi shekteýli jandardy sportqa baýlý, olardyń qoǵamǵa beıimdelýine yqpal etip, sporttyq sheberlikterin shyńdaýǵa baǵyttalǵan is-sharalarǵa toqtaldy. Klýbtyń negizgi maqsattarynyń biri múgedek sportshylardyń kásibı shyńdalýyna, respýblıkalyq jáne halyqaralyq jarystarǵa daıyndalýyna jaǵdaı jasaý ekeni aıtyldy.
Klýb ujymy men sportshylar sport ınfraqurylymyn jaqsartý, jańa sporttyq qural-jabdyqtarmen qamtamasyz etý, jarystarǵa qatysýǵa qarjylaı qoldaý kórsetý, bapkerlerdiń biliktiligin arttyrý syndy máselelerdi kóterdi.
Sondaı-aq sportshylar múgedekter sportyna qoǵam nazaryn arttyryp, qarjylandyrýdy arttyrý qajettigin aıtty. Olar ózderiniń jetistikteri arqyly Qazaqstannyń atyn álemge tanytýǵa daıyn ekenderin, biraq bul úshin tıisti qoldaý men jaǵdaı jasalýy mańyzdy ekenine toqtaldy.
– El úshin múgedekter sportyn damytý mańyzdy. Parlament kóterilgen máselelerdi sheshýge kómektesetin bolady. «Saýran» klýbynyń sportshylarynyń muń-muqtajy da Úkimet deńgeıine jetkiziletin bolady, - dedi depýtat.
Budan soń Kenjeǵul Seıtjan Saıram aýdany men Arys qalasynda da bolyp, jergilikti turǵyndarmen júzdesti. Depýtattyń jumys sapary odan ary jalǵasady.