Májilis depýtaty temirjol kóligimen tasymaldy tejeıtin faktorlardy atady

ASTANA. KAZINFORM – Elimiz temirjol tasymaly naryǵynda básekege qabiletsiz bolyp tur. Bul týraly Májilistegi eldiń kólik-logıstıkalyq áleýetin damytýǵa arnalǵan Úkimet saǵatynda depýtat Nurtaı Sabılıanov aıtty.

- Biz temirjol tasymaly naryǵynda áli de básekege qabiletti bola almaı otyrmyz. Temirjol kóligimen tasymaldaý úlesiniń ósýin tejeıtin negizgi faktorlar mynalar: jyldamdyqtyń tómendigi, tozý dárejesiniń joǵary bolýy jáne uıymdastyrý problemalary. Búgingi kúni jyljymaly quramdy jańartý qarqyny onyń qyzmet etý merzimi men tehnıkalyq jaı-kúıi boıynsha paıdalanýdan shyǵyp qalý qarqynyna ilese almaı otyr. Máselen, 2014-2023 jyldar kezeńinde 928 jańa jolaýshy vagony kelip tússe, fızıkalyq turǵydan tozý sebebine baılanysty 969 vagon paıdalanýdan shyqqan. Árıne, munyń bári temirjol kóligin damytýdyń negizgi kórsetkishterine áser etedi, - dedi ol.

Májilis depýtatynyń dereginshe, temirjol jelileriniń – 54, lokomotıvterdiń – 61, vagondardyń 56 paıyzǵa joǵary dárejede tozýy baıqalady.

- Qanaǵattanarlyqsyz dep baǵalanǵan joldar uzyndyǵynyń úlesi jyl saıyn artyp keledi, - dedi Nurtaı Sabılıanov.

Aıta keteıik, depýtat júk kólikteriniń salmaǵyn ólsheıtin stantsııalar sanyn kóbeıtý qajet ekenin aıtqan edi.