Májilis depýtaty «Taza paraqtan» reformasyn qaıta iske qosýdy usyndy
ASTANA. KAZINFORM – Májilis depýtaty Bolatbek Nájmetdınuly Premer-mınıstr Oljas Bektenovtiń atyna «Taza paraqtan» reformasynyń oıdaǵydaı iske aspaı jatqany týraly depýtattyq saýal joldady.
Saýal avtory elde qabyldanyp jatqan zańdar kásipkerlerdiń quqyǵyn formaldy túrde ǵana eskeretinin, vedomstvoaralyq komıssııalardyń Ulttyq ekonomıka mınıstrligi sııaqty memlekettik organdardyń aldynda qaýqarsyz ekenin aıtady.
- Qazaqstan kásipkerler men ınvestorlar úshin kúrdeli jáne boljaý múmkin emes zańdary bar el retinde qalyp otyr. Bul eldiń kórshi memlekettermen salystyrǵanda básekege qabilettilikti tómendetedi. Sonymen qatar zamanaýı tsıfrlyq tehnologııalar men transshekaralyq múmkindikter otandyq bıznestiń shetelde tirkelip, sonda salyq tóleýine qolaıly múmkindik beredi. Buǵan jol bermeýimiz kerek, - deıdi depýtat.
Bolatbek Nájmetdınuly osylardy aıta kelip, Premer-mınıstr Oljas Bektenovten Prezıdent Qasym-Jomart Toqaevtyń bastamasymen qolǵa alynǵan «Taza paraqtan» reformasynyń iske asyrylý deńgeıine keshendi baǵa berýdi suraıdy.
- Memlekettik organdardyń zań jobalaryn jáne normatıvtik-quqyqtyq aktilerdi daıyndaǵan kezde maquldatý rásimderin saqtaýyna, onyń ishinde retteýshilik áserge taldaý júrgizýdiń durystyǵy men sapasyna tekserý júrgizý kerek. Úkimet janyndaǵy kásipkerlik qyzmetti retteý máseleleri jónindegi vedomstvoaralyq komıssııanyń qyzmetine baǵa berilsin. Salalyq mınıstrlikterdiń ústemdigin boldyrmaý úshin Parlament depýtattary komıssııanyń jumysyna mindetti túrde qatysýy kerek, - deıdi Májilis depýtaty.
Sondaı-aq ol memlekettik organdardyń jumysyn baǵalaý kórsetkishterine bıznesti retteýdegi tıimdiligin qosyp, «Taza paraqtan» reformasynyń ekinshi kezeńin qaıta bastaýdy usyndy.
Sonda-aq, búgin Parlament Májilisiniń jalpy otyrysynda Oljas Nuraldınov depýtat retinde ant berdi.