Májilis depýtaty Shymkenttegi «Jaıly mektep» qurylysymen tanysty
ASTANA. KAZINFORM - Májilis depýtaty, «AMANAT» partııasy fraktsııasynyń múshesi Danabek Isabekov Shymkent qalasynyń Abaı aýdanyndaǵy Jańa Turlan shaǵyn aýdanynda boldy. Depýtat partııanyń «Halyqpen birge!» saılaýaldy baǵdarlamasy aıasynda salynyp jatqan 1200 oryndyq jańa mektep qurylysynyń barysymen tanysty.
Qalada «Jaıly mektep» ulttyq jobasy aıasynda 18 mektep salý josparlanǵan. Onyń 17 300 oryndyq 12-si bıyl, qalǵan 6 mektep 2025 jyly paıdalanýǵa beriledi.
Saılaýshylarmen kezdesýde depýtat Danabek Isabekov qurylysty der kezinde aıaqtap, balalardyń bilim alýyna qolaıly jaǵdaı jasaýdyń mańyzdylyǵyn atap ótti.
– Biz balalarymyzdyń bilim alýy úshin zamanaýı jáne qaýipsiz jaǵdaı jasaýǵa umtylamyz. «Jaıly mektep» jobasy aıasynda salynǵan mektepter sońǵy tehnologııamen jabdyqtalady. Onyń ishinde mobıldi transformatsııalyq ústelder, zamanaýı zerthanalar jáne joǵary jyldamdyqty ınternet bar. Bizdiń basty mindetimiz – oqýshylardyń qaýipsizdigin qamtamasyz etý, olardyń jan-jaqty damýyna barlyq jaǵdaı jasaý, – dedi Danabek Isabekov.
«Jaıly mektep» jobasynda mektepterdi bastaýysh jáne orta synyptarǵa arnalǵan jeke bloktarmen, ámbebap akt zaldarymen, balalarǵa arnalǵan jeke shkaftarmen, oqý-zerthanalyq jabdyqtarmen, joǵary jyldamdyqty ınternetpen jabdyqtaýdy kózdelgen. Sondaı-aq fızıka, hımııa jáne bıologııa, robototehnıka kabınetteri men STEM-zerthanalary bolady.
Qaýipsizdik máselelerine erekshe kóńil bólinedi. Mektep ǵımarattary terrorıstik qaýipterdiń aldyn alý úshin beınebaqylaý jáne dybystyq eskertý júıelerimen, sondaı-aq esik pen blokty qulyptaý fýnktsııasymen jabdyqtalady. Oqýshylardyń sportpen shuǵyldanyp, salaýatty ómir saltyn ustanýy úshin bastaýysh jáne joǵary synyp oqýshylaryna sport zaldary men túrli oıyn alańdary salynady. Ár mektepte óz kitaphanasy, oqý zaly, elektrondy kitaphana jáne ár qabatta kovorkıng alańdary bolady.
Aıta ketý kerek, ótken jyly «AMANAT» partııasynyń saılaýaldy baǵdarlamasy aıasynda Shymkentte 15 mektep salynyp, 3 mektep keńeıtildi.
