Májilis depýtaty «Samuryq-Qazyna» qory qurylymyndaǵy basshylardyń qısapsyz syıaqylary týraly aıtty
Búgin Májilistiń jalpy otyrysynda depýtat Erlan Saırov «Samuryq-Qazyna» qory qurylymyndaǵy kompanııalardyń qarjylyq operatsııalaryn tekserýdi surady, dep habarlaıdy QazAqparat tilshisi.
«Samuryq-Qazyna» ulttyq ál-aýqat qorynyń menedjmenti halyqtyń emes, ózderiniń ál-aýqatyn arttyrýǵa aıanbaı eńbek etip jatyr. Qordyń enshiles «Samuryq-Qazyna Bıznes Servıs» kompanııasynyń basshylyǵy kásiporynnyń tapqan paıdasynan eki ese kóp bonýs alǵan. Kásiporyn basshysy bir jylda 74,9 mln teńge, al basshylyǵy 274 mln teńge bonýs jazyp alǵan. Kásiporynnyń taza paıdasy 38,5 mln teńge ǵana. Óz kezeginde «Samuryq-Qazyna Bıznes Servıs» kompanııasynyń enshiles kásiporny sanalatyn «QAZ KLOÝD» kompanııasynyń da basshylyǵynyń ózderine degen «jomarttyǵynda» shek joq. Kompanııanyń taza paıdasy 61 mln teńge bola tura, «QAZ KLOÝD» menedjmenti premııa retinde 336 mln teńge alǵan», - dedi E. Saırov Úkimet pen Bas prokýratýraǵa joldaǵan saýalynda.
Sonymen qatar depýtat «Qazaqtelekom» basqarmasynyń músheleri jalpy 422 mln teńge syıaqy alǵanyn jetkizdi. Bul rette, árbir múshesine 105 mln teńgeden keledi.
«Bizdiń qarapaıym halqymyz unnyń qymbattaýynan bir úzim nanǵa jarymaı júrgende, bul netken asqandyq?! «Samuryq-Qazyna» ulttyq ál-aýqat qorynyń basshylary, enshiles kásiporyndarynyń basshylary bonýs, syıaqy jazyp alýǵa ǵana qyzmet ete me?» degen zańdy suraq bar. AMANAT Fraktsııasy «Samuryq-Qazyna» qory atyna zaty sáıkes kelýi kerek dep esepteıdi», - dedi E. Saırov.
Osy oraıda ol «Samuryq-Qazynanyń» óz menedjmentine «asyra siltep» syıaqy jazý saıasatynyń zańǵa sáıkestigin anyqtaýdy surady.
«Atap aıtqanda, «Samuryq-Qazynada» qaptaǵan enshiles kásiporyndardyń qanshalyqty qajet ekenin anyqtaý mańyzdy. Qordyń qarjy saıasatynyń ashyqtyǵyn qamtamasyz etetin tetikter jasaý qajet», - dedi depýtat.
