Májilis depýtaty óz atynan Ábıba Ábýjaqynovaǵa arnaıy syıaqy bergeli otyr

ATYRAÝ. KAZINFORM – Májilis depýtaty Aıdarbek Hodjanazarov óz atynan Ábıba Ábýjaqynovaǵa arnaıy syıaqy bergeli otyr.

Bul týraly depýtat áleýmettik jelidegi paraqshasynda jazba qaldyrdy.

«Túnimen dóńbekship uıyqtaı almadym. Oǵan sebep – Ábıba qaryndasymnyń kóz jasy. Bul – namystyń kóz jasy. Bul – tektiliktiń belgisi. Bul – úlken tárbıeniń úlgisi! Qysqasy, Ábıba qyzymyzǵa óz atymnan arnaıy syıaqy beremin. Parıjde Qazaqstannyń abyroıyn qorǵaımyn dep baryn saldy. Jaraqat alsa da qaıtqan joq. Osyndaı eńbekti baǵalaý kerek. Osyndaı patrıottyqty nasıhattaý kerek. Qánekı, jalǵastyraıyq, Qazaqtyń Jigitteri!» - dedi Aıdarbek Hodjanazarov.

Al, belgili metsenat Dýlat Tastekeı Olımpıadadan júlde ala almaǵan Ábıba Ábýjaqynovany ASSYLTAS stıpendııasyna usyný týraly oıyn bildirdi.

«Tokıo Olımpıadasynda qola júlde alǵan Eldos baýyrymyz sol jyly kópshiliktiń sheshimimen ASSYLTAS stıpendııasynyń ıegeri atanǵan edi. Bıyl bul stıpendııany Parıj Olımpıadasynda jankeshtilik kórsetken Ábıba qaryndasymyz alsa, qalaı qaraısyzdar?» - dedi Dýlat Tastekeı.

Eske sala ketelik, buǵan deıin dzıýdoshy Ábıba Ábýjaqynova qazaqstandyqtandar «Úmitterińizdi aqtaı almadym, keshirińizder» dep kózine jas alǵan edi.