Májilis depýtaty otbasynda jıi janjal shyǵaratyndardyń tizimin jasaýdy usyndy

Májilis depýtaty Baqytjan Bazarbek otbasyna maza bermeıtinderdiń jáne masyldardyń tizilimin (reestr) jasaýdy usyndy, dep habarlaıdy QazAqparat tilshisi.

«Barlyǵy zorlyq-zombylyq kórsetýshilerge jazany kúsheıtkenin qalaıdy. Osy oraıda men otbasylyq zorlyq-zombylyqqa qatysty qylmystyq kodekste jazany aýyrlatýdy usyndym. Meniń oıymsha, jazany kúsheıtsek, otbasylyq janjal shyǵarýshylar birneshe ret oılanady. Sonymen qatar, otbasyna maza bermeıtinderdiń jáne masyldardyń tizilimin (reestr) jasaýdy usyndym. Bul tıimdi shara, bizde bul tájirıbe bar, mysaly, alıment tóleýden jaltaryp júrgenderdiń, jer ýchaskelerin maqsatyna saı paıdalanbaıtyn adamdardyń tizilimi bar. Olar úsh jyl ishinde jer ýchaskesin alý múmkindiginen aıyrylady», - dedi Baqytjan Bazarbek Májilistiń zańnama jáne sot-quqyqtyq reforma komıtetinde ótken otyrysta.

Onyń aıtýynsha, otbasylyq buzaqylardyń tizilimin qurý adam psıhologııasyna qatty áser etedi.

«Zań talaptaryn buzǵan adam, ózin tizilimnen shyǵarýǵa tyrysady. Biz zorlyq kórsetýshiniń psıhotıpin zertteýimiz kerek. Otbasynda janjal shyǵarýshylardyń áreketi patologııa emes, ol ómirden sharshap, áıeli men balalarynan bas tartatyn qarapaıym azamat. Balalar kóbine úndeı almaıdy, keıbiri otbasyndaǵy jaǵdaıdy áleýmetik jelige jazýy múmkin. Biraq olardyń úni jete bermeıdi. Biz balalar men áıelderdiń quqyǵyn zorlyq kórsetýshilerden qorǵaýymyz kerek», - deıdi halyq qalaýlysy.