Májilis depýtaty Óskemendegi jańa mekteptiń qurylys jumysyn tekserdi
ÓSKEMEN. KAZINFORM — Shyǵys Qazaqstan oblysynyń Óskemen qalasynda 600 oryndyq jańa mekteptiń qurylysy jalǵasyp jatyr.
Bul bilim ordasy «AMANAT» partııasynyń saılaýaldy baǵdarlamasy men «Keleshek mektepteri» ulttyq jobasy aıasynda salynyp jatyr. Qurylys barysymen Májilis depýtaty, «AMANAT» partııasy fraktsııasynyń múshesi Erlan Saırov tanysty.
Jańa mektep zaman talabyna saı jobalanǵan. Onda hımııa jáne robototehnıka kabınetteri, kitaphana, lıft, ashana, ınklıýzıvti orta, pandýstar men taktıldi jolaqtar qarastyrylǵan. Merdigerlerdiń aıtýynsha, mektep ǵımaraty jańa oqý jyly bastalǵanǵa deıin tolyqtaı paıdalanýǵa beriledi. Mektep iske qosylǵan soń Óskemen qalasyndaǵy qarqyndy damyp kele jatqan aýdandardyń biri – Jibek matalary kombınaty shaǵynaýdanynda ornalasqan mekteptiń júktemesi edáýir azaıady dep josparlanyp otyr.
Búginde Shyǵys Qazaqstan oblysynda bes jańa bilim berý mekemesi paıdalanýǵa berildi. Olar Shemonaıha, Rıdder, Óskemen qalalarynda jáne Glýbokoe aýdanyna qarasty Beloýsovka aýylynda ornalasqan. Sonyń ishinde Shemonaıha aýdanyndaǵy Shákárim atyndaǵy №4 jáne Rıdder qalasyndaǵy №12 jalpy bilim beretin mektepterdiń oqýshylary eski, tozyǵy jetken ǵımarattardyń ornyna salynǵan zamanaýı mektepterdiń tabaldyryǵyn alǵash attady. Bul – «AMANAT» partııasynyń óńirde úsh aýysymdy jáne apatty mektepterdi joıý, kadr jetispeýshiligin azaıtý jáne ınfraqurylymdy jańartý jolyndaǵy jumysynyń aıqyn kórinisi.
Erlan Saırov qazirgi tańda mektep týraly aıtqanda «Pedagog mártebesi týraly» zańdy eskermeý múmkin emes ekendigine nazar aýdardy.
– Óskemende zamanaýı mektep salynyp jatyr. Biraq mundaı bilim ordasynda yntasy bar, bilikti muǵalimder jumys istemese, onyń esh paıdasy joq. «Pedagog mártebesi týraly» zańnyń arqasynda biz sońǵy jyldary tek jalaqyny kóterip qana qoıǵan joqpyz, sonymen qatar jaqsy muǵalimderdi mektepke tartýǵa jáne olardy damytýǵa jaǵdaı jasadyq. Bul – sapaly bilim berýdiń berik irgetasy, – dedi depýtat.
Muǵalim tapshylyǵy ásirese aýyldyq jerlerde áli de sheshilmegen másele. Degenmen, pedagog mártebesin kóterýge baǵyttalǵan zańnamanyń birtindep júzege asyrylýy alǵashqy nátıjesin bere bastady. Muǵalimderdiń jalaqysy eki eseden asa ósti, biliktilik, ǵylymı dáreje jáne tálimgerlik úshin qosymsha ústemaqylar qosyldy, qaǵazbastylyq edáýir azaıdy. Munyń barlyǵy ustaz mamandyǵynyń mártebesin arttyra túsýde.
Aıta ketelik jekemenshik mektepterdegi kemshilikterdi joıýǵa qatysty tıisti erejeni qabyldaý josparlanyp otyrǵany týraly jazǵan edik.