Májilis depýtaty Oraldaǵy «Aqjaıyq» shaǵynaýdanynyń qurylys barysymen tanysty
ORAL. KAZINFORM - Oral qalasynda 50 myń adamǵa arnalǵan jańa «Aqjaıyq» shaǵynaýdanynyń qurylysy qarqyndy júrip jatyr, dep habarlaıdy QR Parlamenti Májlisiniń baspasóz qyzmeti.
Qazirgi tańda segiz kópqabatty úı paıdalanýǵa berilgen. Májilis depýtaty, «AMANAT» partııasy fraktsııasynyń múshesi Baqtyqoja Іzmuhambetov qurylys jumystarynyń barysymen tanysty.
Shaǵynaýdanǵa alǵashqy bolyp baspana kezeginde turǵan azamattar qonystandy. 2023 jylǵy qyrkúıekte 60 páterli besqabatty úıge turǵyndar qonystansa, 2025 jylǵy aqpanda taǵy 120 otbasyǵa jańa páterdiń kilti tabystaldy. Jobanyń alǵashqy kezeńi aıasynda 25 turǵyn úı salý kózdelgen. Búginde shaǵynaýdanda 150 oryndyq medıtsınalyq ońaltý ortalyǵy paıdalanýǵa berilip, sý aıdaý stantsııalary salyndy, magıstraldi ınjenerlik jeliler, jylý trassalary jáne ishki jol ınfraqurylymy júrgizildi.
– Aqjaıyq – halyq sanynyń ósýi, qalalyq ınfraqurylymdy damytý jáne ómir sapasyn jaqsartý maqsatymen boı kóterip jatqan strategııalyq turǵyn aımaq. Biz tek úıler salyp qana qoımaı, jas otbasylar men mamandar, úı kezeginde turǵan azamattar úshin tolyqqandy ómir súrý ortasyn qalyptastyrýymyz kerek. Ol úshin qurylys jumystary turaqty josparlaý qaǵıdattaryna negizdelip, saıabaqtar, mektepter, emhanalar jáne qoljetimdi kólikpen qamtamasyz etilýi tıis, – dedi B.Іzmuhambetov.
Depýtattyń aıtýynsha, qazirgi ýaqytta Májiliste jańa Qurylys kodeksi qaralyp jatyr. Qujat qurylys sapasyn baqylaýdy kúsheıtýdi, zańbuzýshylyqtar anyqtalǵan jaǵdaıda jedel áreket etýdi jáne qurylys materıaldarynyń sapasyna qoıylatyn talaptardy qatańdatýdy kózdeıdi.
Kezdesý barysynda 2024 jylǵy sý tasqynynan zardap shekken turǵyn úılerdi qalpyna keltirý máseleleri de kóterildi. Májilismen Oral qalasy men oblys aýdandarynda 2 myńnan astam úı qalpyna keltirilip, qarǵyn sýdan japa shekken otbasylarǵa jańa baspana nemese qarjylaı ótemaqy berilgenin atap ótti. Baqtyqoja Іzmuhambetov bul jumys «AMANAT» partııasy fraktsııasy músheleriniń turaqty baqylaýynda bolatynyna nazar aýdardy.
Byltyr partııanyń «Halyqpen birge!» saılaýaldy baǵdarlamasy aıasynda Batys Qazaqstan oblysynda 637,4 myń sharshy metr jańa turǵyn úı salyndy. Jalpy 2028 jylǵa deıin 3,2 mln sharshy metr turǵyn úıdi paıdalanýǵa berý, 100-den astam kópqabatty úıge kúrdeli jóndeý jumystaryn júrgizý, sondaı-aq shamamen 600 km ınjenerlik-kommýnaldyq jeli tartý josparlanǵan. Bul qadamdar 20 myńǵa jýyq otbasyny baspanamen qamtamasyz etýge múmkindik beredi.
Osyǵan deıin BQO-nyń shekaralas aýdandarynda ornalasqan 13 mektep taratylýy múmkin ekeni týraly jazdyq.