Májilis depýtaty medıtsınalyq týrızmdi damytý ulttyq baǵdarlamasyn ázirleýdi usyndy

ASTANA. KAZINFORM – Medıtsınalyq týrızm salasynda biryńǵaı operator qurý qajet. Bul týraly búgin Májilistiń jalpy otyrysynda Premer-mınıstr Oljas Bektenovke saýal joldaǵan depýtat Nurgúl Taý aıtty.

- Búginde elimizde boı kóterip kele jatqan salalardyń biri – medıtsınalyq týrızm. Bul baǵyt tek densaýlyq saqtaý júıesin nyǵaıtýmen shektelmeı, el ekonomıkasyna qosymsha kiris ákeletin, jańa jumys oryndaryn ashatyn, halyqaralyq ımıdjdi qalyptastyratyn joǵary áleýetke ıe eksporttyq sala sanalady. Qazaqstandyq medıtsınalyq týrızm qaýymdastyǵynyń resmı málimeti boıynsha elimizdegi medıtsınalyq týrıstterdiń sany 2022 jáne 2024 jyldar aralyǵynda 1 200 adamnan 80 myń adamǵa ósti. Bul kezdeısoq jaǵdaı emes, - dedi ol.

Osy oraıda depýtat oǵan sebepshi bolyp otyrǵan birqatar faktordy atady.

- Birinshiden, Qazaqstanda álemdik standarttarǵa saı joǵary deńgeıdegi medıtsınalyq uıymdarǵa ǵana beriletin medıtsınalyq «Oskar» atanyp ketken JCI (Joint Commission International) akkredıtteýin alǵan 9 mekeme bar. Onyń 7-ýi Astanada, 2-ýi Almatyda. Bul bizdiń aımaqtaǵy kósh bastap turǵan qýantarlyq nátıjemiz. Ekinshiden, elimizdegi joǵary sapaly medıtsınalyq qyzmetter basqa elderge qaraǵanda álde qaıda qoljetimdi. Máselen, Astana ákimdigine qarasty «Astanany damytý ortalyǵynyń» aqparatyna sáıkes, Qazaqstanda júrek shýnttaý hırýrgııasy AQSh-qa qaraǵanda 80 ese, Sıngapýrǵa qaraǵanda 11 ese arzan. Úshinshiden, eldegi medıtsınalyq uıymdardyń medıtsınalyq týrıstterdi tartýǵa ekonomıkalyq jaǵynan múddeli bolýy. Óıtkeni, barlyq týrısttik týrlar ishinde bul sala eldiń naryǵyna meıilinshe kóp qarajat ákeletini belgili, - dedi Nurgúl Taý.

Degenmen, májilismen bul salada da jınalyp qalǵan máseleler az emestigin aıtady. 

- Atap aıtqanda, eldegi medıtsınalyq uıymdar men týrısttik operatorlardyń arasyndaǵy ózara árekettestik joqtyń qasy. Máselen, medıtsınalyq mekemeler týrısttik-bızneske beıimdelmegendikten týrıstterge bıletterdi satyp alý, turmystyq jaǵdaıdy uıymdastyrý sııaqty qosymsha qyzmetterdi sapaly túrde bere almaıdy. Óıtkeni, bul týrısttik uıymdardyń quzyrynda. Sol sebepten klınıkalar men medıtsınalyq týrısterge saýatty qoldaý kórsete alatyn Medıtsınalyq týrızm salasyndaǵy Biryńǵaı operatordy qurý qajet dep oılaımyn.

Onyń quzyretine dıagnostıka jáne emdeý boıynsha konsaltıng, týrıstterdiń sanyn tirkeý, týrısttik ónimdi usyný, tasymal jáne medıtsınalyq aýdarmashy qyzmetin kirgizýge bolady, - dedi depýtat. 

Nurgúl Taý medıtsınalyq vıza máselesine de toqtaldy. Ol medıtsınalyq týrızm deńgeıin arttyrý úshin medıtsınalyq týrıstterge arnalǵan arnaıy tsıfrlyq vızany qolǵa alý qajet dep sanaıdy.

- Qorytyndylaı kele, medıtsınalyq týrızmdi damytý arqyly elimizdi Ortalyq Azııadaǵy jetekshi medıtsınalyq habqa aınaldyrýǵa tolyq múmkindik bar. Sizden atalǵan usynystardy Úkimet deńgeıinde qarastyryp, «Medıtsınalyq týrızmdi damytý» boıynsha ulttyq baǵdarlama ázirleý jóninde tapsyrma berýdi suraımyz, - dedi depýtat.

Buǵan deıinQazaqstandaǵy 3-shi megapolıs medıtsınalyq týrızmdi myqtap qolǵa alǵaly otyrǵanyn jazǵan edik.