Májilis depýtaty Qytaıdan Qazaqstanǵa kiretin kólikterge qosymsha tólem belgileýdi surady

— Qazaqstan men Qytaı arasyndaǵy avtotýrızm kólemi artyp keledi. Alaıda sheteldik avtokólikterge qoıylatyn talaptarda aıqyn teńgerimsizdik qalyptasqan. Qazaqstanda tirkelgen avtokólik Qytaı aýmaǵyna kirgen kezde, ýaqytsha ákelý rásiminen ótedi, ýaqytsha júrgizýshi ruqsatyn alady, ýaqytsha tirkeý, arnaıy nómir jáne saqtandyrý rásimdeledi, sondaı-aq qujattardy aýdarý jáne notarıaldyq rásimderden ótedi. Kólik Qytaı aýmaǵynda qalyp qoımaýy úshin kepildik jáne baqylaý rásimderi qoldanylady. Bul rásimderdiń barlyǵy aqyly negizde júrgiziledi, ıaǵnı arnaıy qyzmetkerlerdiń shyǵynyn óteıdi. Qazirgi málimetterge toqtalsaq, bir qazaqstandyq avtokólikke qatysty barlyq rásimniń quny shamamen 8-9 myń ıýan. Bul búgingi baǵammen shamamen 560 myń teńge. Bul rette Qytaı jaǵy sheteldik kólikterdi baqylap qana qoımaı, bul rásimderden resmı tabys kózin qalyptastyrǵan, — dedi Bolatbek Najmetdınuly Premer-mınıstrdiń atyna joldaǵan saýalynda.

Atap aıtqanda, Qazaqstan aýmaǵyna kiretin sheteldik, onyń ishinde Qytaı kólikterine qatysty rásimder aıtarlyqtaı jeńildetilgen. Kóp jaǵdaıda tek ýaqytsha ákelý keden rásimimen shekteledi jáne ol tegin.

— Qazirgi málimetter boıynsha, sońǵy bir jyl jáne bıylǵy jyldyń alǵashqy tórt aıynyń ózinde Qazaqstan aýmaǵyna 8 myńnan astam Qytaı avtokóligi kirgen. Osyǵan baılanysty tıisti suraqtar týyndaıdy. Qytaılyq memlekettik nómirlerdi foto-beınetirkeý (Sergek) júıeleri tolyq kólemde anyqtaı ma? Jol erejesin buzý jaǵdaıynda aıyppuldardy óndirip alý qalaı júzege asyrylady? Saqtandyrý jáne zalaldy óndirip alý tetikteri qanshalyqty tıimdi? Qazaqstan ýaqytsha tirkeý, ýaqytsha nómir jáne ákimshilik alymdardy nege engizbeıdi? Nege Qazaqstan bul shyǵyndardy is júzinde tegin kóterýi tıis, al basqa memleketter mundaı rásimderden resmı tabys qalyptastyrady? Eger Qazaqstan da osyndaı teń tásildi qoldansa, onda tek osy kólemniń ózinen bıýdjetke jáne qyzmet kórsetýshi ınfraqurylymǵa shamamen 5 mlrd teńge kóleminde qosymsha túsim qalyptasýy múmkin edi jáne shekara men keden qyzmetkerleriniń shyǵynyn óteýge múmkindik paıda bolar edi, — dedi depýtat.

Onyń aıtýynsha, bul turǵyda kóterilip otyrǵan másele týrızmdi shekteý týraly emes, ıaǵnı teń quqyqtyq tásil, qaýipsizdik, baqylaý jáne memlekettik shyǵyndardyń ótelýine qatysty.

— Osyǵan baılanysty Qazaqstan aýmaǵyna kiretin sheteldik avtokólikter boıynsha memlekettik shyǵyndarǵa taldaý júrgizýdi suraımyn. Sonymen qatar, ýaqytsha tirkeý, qaýipsizdik maqsatynda ýaqytsha nómir jáne ákimshilik alymdar engizý máselesin qaraýdy usynamyn. Munymen qosa, Qazaqstan azamattaryna Qytaı tarapy qoldanatyn talaptarǵa sáıkes keletin teńgerimdi tásil ázirleýdi suraımyn, — dedi Bolatbek Najmetdınuly.

Aıta keteıik, jaqynda Beıjiń qalasynda Halyqaralyq avtomobıl tasymaldary jónindegi Qazaqstan-Qytaı birlesken komıtetiniń otyrysy ótti.