Májilis depýtaty kıik múıizine qatysty sottalǵandardyń máselesin kóterdi
ASTANA. KAZINFORM — Búgin Májilistiń jalpy otyrysynda depýtat Abzal Quspan kıik múıizine qatysty isti bolǵan adamdardyń máselesin kóterdi.
«Kıiktiń derıvattary úshin ádiletsiz sottalyp jatqan aýyl azamattarynyń jaǵdaıyn aıtqym kelip otyr. Kıiktiń derıvattary, ıaǵnı múıizi úshin sottalyp jatqandar — ań atýdy kásip qylǵan brakonerler emes nemese uıymdasqan qylmystyq toptar emes, qarapaıym aýyl turǵyndary. Olardy ádiletsiz sottaldy deýime naqty dálel retinde oqyp tanysqan júzden astam sot aktisi bar. Kıikti atpaǵan, biraq onyń múıizin satqan (jınaǵan, saqtaǵan, tasymaldaǵan) adamdardy qorshaǵan ortaǵa mıllıondaǵan, tipti mıllıardtaǵan teńgege zalal keltirdi dep, jappaı sottaý praktıkasy 2021 jyldyń tamyz aıynan bastaldy. Oǵan negiz — Joǵarǵy Sottyń sol kezdegi qylmystyq ister jónindegi alqa tóraǵasy bolǵan Abdrashıt Júkenovtiń oblystyq sot basshylaryna joldaǵan nusqaý-haty. Hat qylmystyq kodekstiń 339-babyn túsindirý/razıasnenıe dep atalǵanymen, máni boıynsha tikeleı nusqaý formasynda rásimdelgen. Ol hattyń jazylýyna óz kezeginde sol kezdegi Bas prokýror Ǵızat Nurdáýletovtiń aqparaty negiz bolǵan», - dedi Abzal Quspan QR Bas prokýrory Berik Asylovtyń atyna joldaǵan saýalynda.
Onyń aıtýynsha, osynyń saldarynan, kıikti atýǵa qatysy joq azamattar buryn qylmystyq kodekstiń 339-babynyń 1-bóligimen sottalyp kelse, 2021 jyldyń tamyz aıynan bastap olardyń áreketi sol baptyń 3-bóligimen dárejelenip, moıyndaryna júzdegen mıllıonnan birneshe mıllıardtaǵan somaǵa aıyppuldar salynyp, naqty bas bostandyǵynan aıyrýǵa sottalyp jatyr.
«Bul jerde men zerdelegen sot aktilerindegi negizgi qatelik — ol kez kelgen qylmystyq iske qatysty qoldanylatyn basty prıntsıp — qylmystyq áreket pen odan kelgen zalaldyń arasyndaǵy sebep-saldarlyq baılanystyń anyqtalmaýy. Barlyq jaǵdaıda is bir stsenarıımen júredi, ıaǵnı kıiktiń múıizderi tabylady, is qozǵalyp, Úkimet tarapynan ekologııa mınıstrliginiń ýákiletti komıteti arqyly kıiktiń quny shyǵarylady (bir kıik 2,5 mln). Al tergeý organdary men sot azamatty kıikti óltirý arqyly tabıǵatqa asa iri mólsherde zııan keltirgeni úshin sottaıdy. Ol kıiktiń ólý sebebi anyqtamaıdy. Odan basqa, sot sol kıiktiń múıizderin bir tıyndyq quny joqtyǵy sebepti, qajeti bolmaýyna baılanysty órteýge úkim shyǵarady. Sottyń da, Úkimettiń de áreketterinde zań bylaı tursyn, eshqandaı logıka joq», — dedi depýtat.
Bul turǵyda ol jaz kezinde osy jaǵdaılarmen sottalǵan azamattardyń týystarymen júzdesip, BQO advokattar alqasynda jınalys ótkizgenin aıtty.
«Báriniń aıtatyny — Joǵarǵy sottan kelgen nusqaý hat. Pavlodar qalasyndaǵy túrmede jazasyn ótep jatqandarmen de kezdestim. Ol jerde 58 azamat otyr, árqaısysynyń moınynda myna ǵumyrlarynda ótep bola almaıtyn zalal bar, osynyń saldarynan kóptegen otbasylar ajyrasyp jatyr. Eń soraqysy, ishterinde birde-bir brakoner joq», — dedi ol.
Osy oraıda A. Quspan Bas prokýror tarapynan buǵan deıin Joǵarǵy sotqa joldanǵan aqparatty keri qaıtarýdy surady.
«Ekinshiden, Joǵarǵy sottyń oblystyq sot tóraǵalaryna joldaǵan 2021 jylǵy tamyzdaǵy nusqaý-hattyń kúshin joıý kerek. Úshinshiden, Qylmystyq kodekstiń 339-baby, 3-bóligimen shyqqan sot Úkimderine taldaý júrgizip, narazylyq berýdi suraımyn», — dedi depýtat.
