Májilis depýtaty: Qazaqstan jasandy ıntellektini paıdalaný arqyly barlyq salany damyta alady
ASTANA.KAZINFORM - Parlament Májilisiniń depýtaty Nurtaı Sabılıanov qazirgi álemdik básekede Qazaqstannyń basty basymdyǵy IT tehnologııalar men jasandy ıntellektini damytý bolýy tıis ekenin aıtty.
– Qazirgi birinshi basymdyq - IT tehnologııa salasy. Jasandy ıntellektini qoldaný arqyly ár salany damytýǵa bolady dep oılaımyn. Bizde oǵan tolyq resýrs bar. Kóptegen bilimdi jastarymyz bar, solardy qoldaýymyz kerek, - dedi ol Jibek Joly telearnasyna bergen suhbatynda.
Depýtattyń aıtýynsha, ekonomıkany alǵa jyljytý úshin avtomobıl, temirjol jáne port ınfraqurylymyn keńeıtý qajet. Jol salý kezinde optıkalyq-talshyqty ınternet jelisin birge tartý mindetti normaǵa aınalyp otyr. Sonymen qatar baılanys sapasyn jaqsartatyn zańdyq ózgerister qabyldanǵan.
– Biz zańǵa ózgerister engizip, bir telefon qurylǵysynda birneshe SIM-karta qoldanýǵa múmkindik jasadyq. 3 myńǵa jýyq aýyl osyndaı júıemen qamtamasyz etilmek. Qazir salynyp jatqan Dostyq-Moıynty baǵytyna da talshyqty jeli tartylyp jatyr, - dedi Sabılıanov.
Depýtat Qazaqstan jaǵdaıynda agroónerkásip eń tıimdi sala ekenin aıtty. Biraq oǵan jańa tehnologııa, qarjylandyrý jáne óńdeý ónerkásibi jetkiliksiz.
– Jerimiz de, jaǵdaıymyz da aýyl sharýashylyǵymen aınalysýǵa qolaıly. Biraq jún men teri óńdeıtin ónerkásip joq, soǵan basymdyq berýimiz kerek. Aýylda kásippen aınalysamyn degen azamattarǵa arzandatylǵan nesıe, kepildik tetikteri qarastyrylyp jatyr. Prezıdent tapsyrmasymen shaǵyn, orta jáne iri bızneske memlekettik kepildik berý týraly zań qabyldadyq. Aýyl sharýashylyǵy kolledjderiniń materıaldyq-tehnıkalyq bazasyn kúsheıtip, jastardy jumysqa daıyndaýymyz qajet, - dedi ol.
Investıtsııa tartý boıynsha elde jańa baqylaý jáne qoldaý júıesi engizilip jatyr. Endi ınvestorlar biryńǵaı reestr arqyly jumys isteıdi.
– Prezıdenttiń ınvestorlardy qorǵaýǵa arnalǵan jarlyǵy shyqty. Onyń basty maqsaty - Qazaqstanǵa keletin ınvestıtsııany baqylaý ǵana emes, olarǵa jeńildik berý. Investorlar kelisimshartqa elektrondy túrde qol qoıyp, qandaı qarajat quıatyny jáne qaıda jumys isteıtini anyq kórinedi. Oblystarǵa keletin ınvestıtsııalar da biryńǵaı aqparattyq júıege engizilýi tıis, - dedi Májilis depýtaty.
Aıta keteıik, bul usynysty Prezıdent Qasym-Jomart Toqaev Býrabaıdaǵy Ulttyq quryltaıda aıtqan. El Táýelsizdiginiń 40 jyldyǵyna deıin oryndalýy tıis strategııalyq mindetter aıasynda kóterilip otyr.