Májilis depýtaty kásipkerlikke ne kedergi ekenin aıtty

QYZYLORDA. KAZINFORM – Qyzylordada bastalǵan Ulttyq quryltaıdyń sektsııa otyrysynda Parlament Májilisiniń depýtaty Nurtaı Sabılıanov kásipkerlikti damytýǵa qandaı faktorlar kedergi keltirip otyrǵanyn aıtty.

Onyń birinshisi — shaǵyn jáne orta bızneske nesıeniń joǵary ústememen berilýi.

- Nesıe jeńildetilgen mólsherlememen berilýi, ıaǵnı ol 8%-dan aspaýy kerek. Ekinshi deńgeıli bankter búgingi kúni 20-25%-pen berip jatyr. Bulaı biz kásipkerlikti damyta almaımyz. Osy máseleni sheshetin bolsaq, kásippen aınalysýǵa ynta bildirgen azamattarǵa qolaıly jaǵdaı qalyptasady, - dedi depýtat.

Ol bıyl ǵana kúshine engen salyq kodeksin qaıta qaraýdy usyndy. Óıtkeni jeke kásipker jeńildetilgen deklaratsııa júıesimen jumys istep, zańdy tulǵa onyń qyzmetin tutynǵanymen, shyǵyndalatyn — kásipker. Nurtaı Sabılıanov sondyqtan kodekske ózgerister men tolyqtyrýlar engizýge daıyn ekenin jetkizdi.

- Aýyl sharýashylyǵyn damytý baǵytynda «Aýyl amanaty» baǵdarlamasy júzege asyrylyp jatyr. Baǵdarlama boıynsha 5-7 jylǵa 2,5%-ben jeńildetilgen nesıe beriledi. Biz qarajat kólemin ulǵaıtýdy jáne qarajat alý kezinde kepildik qoıý máselesine nazar aýdarýdy suraımyz. Óıtkeni aýyldaǵy úılerdiń quny tómen. Kepilge qoıýǵa jaramaıdy. Osy máselelerdi sheshý kezek kúttirmeıdi, - dedi Májilis depýtaty.

Buǵan deıin Premer-mınıstriniń orynbasary-Ulttyq ekonomıka mınıstri Serik Jumanǵarın elimizdiń 2025 jylǵy ekonomıkalyq damý qorytyndylary men bıylǵy jospary týraly baıandady.