Májilis depýtaty Qaraǵandy oblysynda salynyp jatqan qatty turmystyq qaldyqtar polıgonyna bardy
QARAǴANDY. KAZINFORM — Májilis depýtaty, «AMANAT» partııasy fraktsııasynyń múshesi Nıkıta Shatalov Abaı qalasynda qatty turmystyq qaldyqtar polıgonynyń qurylys jumysy barysymen tanysty.
Búginde polıgon qurylysynyń 90 paıyzy aıaqtalǵan, bıyl qyrkúıek aıynda paıdalanýǵa beriledi dep josparlanyp otyr. Partııanyń saılaýaldy baǵdarlamasy aıasynda salynyp jatqan jańa nysan Qaraǵandy oblysyndaǵy ekologııa máselesin sheshýge baǵyttalǵan.
Abaı qalasyndaǵy polıgon ákimshilik ǵımaraty, medıtsınalyq pýnkti jáne qyzmetkerlerge qajet barlyq ınfraqurylymy bar tolyqqandy keshen retinde salynyp jatyr. Munda qýattylyǵy jylyna 15 myń tonna bolatyn qaldyqtardy suryptaý jelisi jumys isteıdi. Plastıkti qaıta óńdeýge arnalǵan press-stanoktar men jabdyqtar qarastyrylýda. Shıkizatty ýaqytsha saqtaýǵa arnalǵan alańdar men qaldyqtardy kómýge negizdelgen transheıalar bar, sondaı-aq nómir bekitý júıesi bar elektrondy avtomobıl tarazylary ornatylǵan.
Nysandy qaldyqtardy jınaý, suryptaý jáne qaıta óńdeý jumysymen aınalysatyn arnaıy kásiporyn paıdalanady. Abaı aýdanynda jańa jumys oryndary ashylady. Turǵyndardyń ekologııalyq qaýipsizdigine kepildik berilip, qorshaǵan ortanyń jaı-kúıine zamanaýı baqylaý jasalady.
Nıkıta Shatalovtyń aıtýynsha, polıgon qurylysy — Memleket basshysy Qasym-Jomart Toqaevtyń jańa ekologııalyq mádenıetti qalyptastyrý jáne zamanaýı óńdeý tehnologııalaryn engizý boıynsha bergen tapsyrmalaryn júzege asyrýdyń jarqyn dáleli.
— Qatty turmystyq qaldyqtarǵa arnalǵan zamanaýı polıgon salý ekologııalyq jaǵdaıdy edáýir jaqsartýǵa, ozyq óńdeý tehnologııalaryn engizýge jáne qosymsha jumys oryndaryn ashýǵa múmkindik beredi. Bul — óńirdi damytý jáne turǵyndardyń turmysyn jaqsartý isine qosylǵan úlken úles. Osyndaı jobalar biz úshin asa mańyzdy. Bul — saılaýshylarǵa bergen ýádemiz oryndalyp jatqanynyń naqty kórinisi, — dedi depýtat.
Budan basqa, «AMANAT» partııasynyń saılaýaldy baǵdarlamasy aıasynda Qaraǵandyda qatty turmystyq qaldyqtardy energetıkalyq kádege jaratatyn zaýyt qurylysy kózdelgen. Al oblys aýmaǵynda 2027 jylǵa deıin suryptaý jelisi bar taǵy 6 qatty turmystyq qaldyqtar polıgonyn salý josparlanyp otyr.