Májilis depýtaty Forbes tizimindegi kásipkerdiń kompanııasyna arasha tústi
ASTANA. KAZINFORM — Májilis depýtaty Anas Baqqojaev Joǵary aýdıtorlyq palatanyń 2024 jylǵy bıýdjettiń atqarylýy týraly qorytyndysyn talqylaǵan otyrysta Forbes tizimindegi kásipkerdiń qus etin shyǵaratyn kompanııasyna arasha tústi.
— Sizder aýdıt qorytyndysynda qus sharýashylyǵyndaǵy 15 mlrd teńgeniń sýbsıdııasyn Aitas Group deıtin bir ǵana kásiporyn alyp otyrǵanyn jazypsyzdar. Onyń quryltaıshysy Forbes tizimine kiredi dep jazyp qoıǵansyzdar. Basqa aqparat joq. Ol esepti oqyǵan adamdar qandaı qorytyndy shyǵarady? Bul tıimsiz sýbsıdııa eken, dep qarjy mınıstrligi kelesi jyly aqsha bermeı qalýy múmkin, — degen Májilis depýtaty.
Sondaı-aq, ol atalǵan kompanııanyń jetistikterin jipke tizdi.
— Men sizge bir málimet keltireıin, Aitas Group degen holdıng — búkil Qazaqstandaǵy ár úshinshi qus etin shyǵaratyn mekeme. Olar Óskemen qus fabrıkasyn aıaqqa turǵyzyp, óndiris qýatyn 60 myń tonnaǵa deıin jetkizdi. Odan bólek Makınsk fabrıkasyn, jap-jańa qylyp salyp, qýatyn 100 myń tonnaǵa jetkizýdi kózdep otyr. 25 mlrd teńge óz qarajatyn quıyp, Almatyda ınkýbator saldy. Qonaev qalasynda jańadan qus sharýashylyǵyn qolǵa alaıyn dep otyr. Jalpy 5 jyldyń ishinde aýyl sharýashylyǵyna quıǵan ınvestıtsııasy — 109 mlrd teńge. Salyq retinde tólegeni — 36 mlrd teńge. Búkil alǵan sýbsıdııasyn salyǵymen jaýyp otyr. Nege osynyń bárin aýdıt kezinde eskerilmegen, — dedi depýtat.
Aıta ketý kerek, onyń aıtyp otyrǵany — túpki benefıtsıary Serik Tolyqpaev deıtin azamat, «Aitas KZ» aktsıonerlik qoǵamy. Birneshe qus fabrıkasyna ıelik etetin Aitas Group-tyń quryltaıshysy osy uıym. Al Serik Tolyqpaevtyń ózi Forbes Kazakhstan reıtınginde 42 orynda tur.
Joǵary aýdıtorlyq palata tóraǵasy Álıhan Smaıylov qus sharýashylyǵyndaǵy búkil sýbsıdııany bir ǵana kásiporyn alyp otyr degen málimet jalǵan ekenin aıtty.
— Bul máseleni sizdermen buǵan deıin de jeltoqsan aıynda talqylaǵanbyz. Al myna aıtyp otyrǵanyńyz ne túsinbeýshilik, ne tehnıkalyq qatelik shyǵar. Jaýabyn keıin jazbasha bereıin, — dedi JAP tóraǵasy.
Eske salsaq, byltyr Álıhan Smaıylov elimizdiń ońtústiginde «108 jastaǵy» sıyrǵa sýbsıdııa tólengenin rastaǵan bolatyn.