Májilis depýtaty: Benzın tapshylyǵy tyǵyryǵynan shaǵyn munaı óńdeý zaýyttary shyǵara alady
ASTANA. KAZINFORM – Shaǵyn munaı óńdeý zaýyttaryna kvota belgilep berý kerek. Bul týraly BIZDIÑ ORTA podkastynda Májilis depýtaty Murat Ergeshbaev aıtty.
– Elimizde úsh úlken munaı óńdeıtin zaýyt bar. Memleket basshysy birneshe márte solardy qaıta jańartý, jabdyqtaý, munaı kólemin arttyrý kerektigin aıtyp, tapsyrmalar bergen bolatyn. 2025 jyly osy úsh zaýyt munaı óńdeý kólemin 17 mln tonnadan 26 mln tonnaǵa jetkizý kerek bolatyn. Jospar bar edi. Ókinishke qaraı qazirgi tańda ol zaýyttardyń óńdeý kólemin ondaı deńgeıge jetizý josparlary da joq. Sodan keıin, nege ekenin bilmeımiz, kóktem men kúzde jóndeýge jabylyp qalady. Árıne bul amal joqtyń áreketi shyǵar. Biraq, basqa da tásilderdi qarastyrý qajet, - dedi depýtat.
Osy oraıda ol elimizde 50-den astam shaǵyn munaı óńdeý zaýyty bar ekenine nazar aýdartty.
– Kóbi batysta, Qyzylorda jaqta ornalasqan, Tarazda da bar. Biraq shıkizattary joq. Olardyń ishinde 20-dan astamy naqty jumys istep tur. Ókinishke qaraı, olarǵa munaı kvotasy qarastyrylmaǵan, berilmeıdi. Olar munaıdy jańa kompanııalar jer qoınaýyn burǵylap jatqan kezde, munaı kólemi naqty betilmegen kezde ǵana alady. Eger olarǵa kvota berilse, zaýyttaryn jańǵyrtyp, jabdyqtap jumys isteıtin edi. Muny ózderi de aıtyp otyr. Olardyń qazirdiń ózinde Eýro-5, Eýro-6 benzınin shyǵarýǵa múmkindikteri bar. Dál qazirgi kezde osy shaǵyn munaı zaýyttary bizdi tyǵyryqtan shyǵarar edi, - dedi ol.
Májilis depýtaty elimiz janar-jaǵarmaı tapshy kezde Reseıden alatynyn, al qazir kórshi elde de ahýal qıyn ekenin aıtady.
– Kúzgi jıyn-terim aman-esen ótip jatyr. Endi kóktemgi egistik jumystarynda jaǵdaı qalaı bolmaq. Sondyqtan qazirden bastap kvota belgilep berse, shaǵyn munaı óńdeý zaýyttar janar-jaǵarmaı shyǵarýǵa daıyn. Energetıka mınıstrligi muny qatań baqylaýǵa alýy tıis, - dedi Murat Ergeshbaev.