Májilis depýtaty Bas prokýratýradan «SQ-Farmatsııa» basshylaryn tergeýdi talap etti

ASTANA. KAZINFORM — Májilis depýtaty Baqytjan Bazarbek Bas prokýratýradan «SQ-Farmatsııa» kompanııasyn tekserip, basshylaryn qamaýǵa alýdy surady. Depýtat Facebook-tegi paraqshasynda Bas prokýratýraǵa aryz joldaǵanyn málimdedi. 

Aryzda ol «SQ-Farmatsııa» JShS, Ulttyq dári-dármekter saraptamasy ortalyǵy, Biryńǵaı dıstrıbıýtor jáne elimizdegi farmatsevtıkalyq kompanııalardyń tergeýdi suraǵan.

Onyń aıtýynsha, bul – tekserý júrgizý týraly tórt aryzdyń alǵashqysy. Qalǵan aryzdar densaýlyq saqtaý uıymdarynyń jumysy, aýyl sharýashylyǵyndaǵy sýbsıdııalar jáne respýblıkalyq bıýdjetti oryndaý jónindegi esep boıynsha birqatar mınıstrlikterge qatysty bolmaq.

Depýtattyń málimdemesi Joǵarǵy aýdıtorlyq palatanyń (JAP) tekserý nátıjelerine negizdelgen. Aýdıtorlar 2022–2023 jyldary:

• «SK-Farmatsııa» keıbir dári-dármekti naryqtaǵy baǵadan 40–365% qymbatqa satyp alǵanyn;
• Jospar durys bolmaı, 2,8 mlrd teńgege alynǵan dárini medıtsınalyq mekemeler qabyldaýdan bas tartqanyn;
• Taǵy 280 mln teńgeniń dárisi múlde jaramsyz bolǵandyqtan tizimnen shyǵarylǵanyn;
• Jalpy memleketke keltirilgen shyǵynnyń 17,2 mlrd teńgege jetkenin;
• Sonymen qatar farmkompanııalarǵa 538 mln teńge artyq tólengenin anyqtady.

Endi Baqytjan Bazarbek sotqa deıingi tergeý júrgizip, qamaýǵa alý jáne qylmystyq is qozǵaýdy talap etip otyr . Onyń aıtýynsha, farmatsevtıka salasynda júıeli baqylaýdyń bolmaýy bıýdjet qarjysynyń tıimsiz jumsalýyna ákep soqty.

– Biz Bas prokýratýradan farmatsevtıka salaǵa keshendi prokýrorlyq tekserý júrgizýdi, quqyq qorǵaý organdarynan tergeý sharalaryn jáne kináli tulǵalardy qamaýǵa alýdy surap otyrmyz, – dedi depýtat.

Sonymen qatar Joǵary aýdıtorlyq palata tóraǵasy Smaıylov eldiń farmatsevtıka naryǵyna 1,2 trln teńge qarjy jumsalǵanyn, biraq salada naqty jetistik az ekenin aıtqan edi.

Buǵan deıin Baqytjan Bazarbek bıýdjet qarajatyn jymqyrý faktisi boıynsha Bas prokýratýraǵa 4 aryz beretinin jazǵan edik.