Májilis depýtaty azamattardyń derbes derekterin qorǵaýdy kúsheıtýdi usyndy

ASTANA. KAZINFORM — Azamattardyń derbes derekteriniń jarııa bolǵany úshin jaýapkershilikti kúsheıtý qajet. Bul týraly Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıevtiń atyna saýal joldaǵan Májilis depýtaty Ábýtálip Mýtáli aıtty.

- Qazaqstan Úkimet qysqa merzimniń ishinde azamattardyń derbes derekterin qorǵaý boıynsha shynaıy sharalardy qabyldaýy tıis dep esepteımin. Zańdardaǵy derbes derekterdi zańsyz qoldanǵany úshin jaýapkershilik jónindegi normalardy barlyq jerde qoldaný, halyqaralyq standarttardy eskere otyryp, jeke derekterdiń jarııa bolǵany úshin jazany arttyrý, memlekettik jáne kvazımemlekettik aqparattyq júıelerdiń álsiz jerlerine keshendi tekserý júrgizý, negizgi ІT-júıelerge aýdıt júrgizý, nátıjesi boıynsha anyqtalǵan táýekelderdi joıý josparyn ázirleý qajet. Bul sharalar rásimdik bolyp qalmaı, azamattardy qorǵaýdyń jáne memlekettik júıege senimdi nyǵaıtýdyń shynaıy quralyna aınalýy tıis, - dedi Májilis depýtaty.

Ol jarııa etken resmı derekterge qaraǵanda, bıyl elimizde 14 myńnan astam ınternet alaıaqtyq tirkelgen. Bul ótken jylǵy faktilerden 22 paıyzǵa kóp.

- Onlaın alaıaqtar aldynda zeınetkerler, jastar, halyqtyń áleýmettik qorǵalmaǵan toptary erekshe álsizdik tanytady. Olarǵa kredıt aýyrtpalyǵyn júkteıdi jáne olar tóleýge májbúr. Salystyrý úshin aıtar bolsaq, 2024 jyly ınternet-alaıaqtyq boıynsha 22,9 myń qylmystyq is tirkelgenimen kóp jaǵdaıda tergeý toqtatylǵan. Óıtkeni, qylmyskerlerdi taba alǵan joq. Bul tsıfr problema aýqymyn jáne qoldanystaǵy sharalardyń anyq jetispeıtindigin aıqyn kórsetedi, - dedi Ábýtálip Mýtáli.

Osy jyldyń maýsymynda «Qazaqstan turǵyndary 2024» ataýymen tirkelgen jańa aýqymdy derekqordyń ınternet keńistigine taraǵany anyqtalǵan edi.