Májilis depýtaty: Áıeldiń qazirgi qoǵamdaǵy róli erlikpen para-par
ASTANA. KAZINFORM – QR Parlamenti Májilisiniń depýtaty Oljas Quspekov zamanaýı qazaqstandyq áıeldiń jańa modelin qalyptastyrý jóninde bastama kóterdi.
«Biz uly jetistikter men aýyr qylmystar týraly qarama-qaıshy aqparat kún saıyn qatar jetip otyratyn zamanda ómir súrip jatyrmyz. Al osynyń barlyǵynyń túp-tamyry – adamda. Al adam eń aldymen otbasynan bastaý alady. Dál osy jerde áıel sheshýshi ról atqarady. Ol alǵashqy qundylyqtardy qalyptastyryp, búkil ómirge baǵyt beredi», – dedi Oljas Quspekov.
Depýtat búgingi qoǵamda áıelge orynsyz pikirler jıi tańylatynyn atap ótti.
«Keı jerlerde áıelge toqal bolý nemese bireýdiń otbasyn buzýshy rólin usyný syndy modelder nasıhattalady. Biraq basqa jol da bar – ol áıeldiń ana, kóshbasshy, danalyq pen úılesimdiliktiń ıesi retindegi joly», – dedi ol.
Oljas Quspekov mysal retinde ótken ǵasyrdaǵy Japonııany keltirdi. Ol elde qyzdarǵa joǵary bilimsiz turmysqa shyǵýǵa tyıym salatyn ereje bolǵan. Onyń aıtýynsha, dál osy norma áıelge degen qurmet pen bilimge basymdyq beretin bolashaq qoǵamnyń irgetasyn qalady.
«Ata-babamyz “Áıel bir qolymen besikti, bir qolymen álemdi terbetedi” degen. ıAǵnı, analarymyz besikti ǵana emes, búkil ultty terbetedi. Bul “otqa túsip, erlik jasaý” jaıly emes, qazaq áıeliniń shynaıy mıssııasy tepe-teńdikti saqtaý, rýh berý jáne bolashaq urpaqty qalyptastyrý degendi bildiredi», – dep atap ótti spıker.
Depýtat partııa janyndaǵy Re.Women qozǵalysy jaı ǵana qaýymdastyq emes, áıeldiń qoǵamdaǵy rólin qaıta paıymdap, oǵan mán berip, qurmet kórsetip, únin tyńdaýdy maqsat etken qoǵamdyq qozǵalystyń bastaýy ekenin aıtty.
«Onyń maqsaty — áıelderdiń kóshbasshylyq áleýetin damytý, bilim berýdi qoldaý jáne qazaqstandyq áıeldiń jańa modelin qalyptastyrý. Joba kásipker áıelderdi, qoǵam qaıratkerlerin, sarapshylardy jáne teńdik, damý men mádenı sabaqtastyq qundylyqtaryn bólisetin er azamattardy biriktiredi», - dep túsindirdi depýtat.
Aıta keteıik, Atyraý oblysynda aýyl áıelderiniń aımaqtyq forýmy ótti.