Májilis depýtaty «Aýyl amanaty» jobasy aıasynda iske qosylǵan kásipkerlik nysandarǵa bardy
QYZYLORDA. KAZINFORM — Búgin Májilis depýtaty, «AMANAT» fraktsııasynyń múshesi Murat Ábenov «Aýyl amanaty» jobasy aıasynda nesıe alyp, kásibin bastaǵan birqatar azamatpen kezdesip, óndiris oryndaryn aralady.
«Aýyl amanaty» – aýyl halqynyń ál-aýqatyn jaqsartýǵa jáne áleýmettik máselelerin sheshýge baǵyttalǵan biregeı joba. Jyldyq 2,5 paıyzben jeńildetilgen nesıe azamattarǵa ıdeıalaryn júzege asyrýǵa, óz isin ashýǵa jáne jumyssyzdyqty azaıtýǵa múmkindik beredi. Osy maqsatta ótken jyly respýblıkalyq bıýdjetten óńirge 3 mlrd teńge bólinip, 406 joba nesıelendirilgen. Aqsýat aýyldyq okrýginiń turǵyny Alma Ysmaılova osy joba aıasynda nesıe alyp, qazir jylyjaı sharýashylyǵyn damytyp otyr.
«Ata-babamyz eginshilikpen aınalysqan. Sol umyt bolyp qalǵan dástúrdi osy «Aýyl amanaty» jobasy aıasynda nesıe alyp, júzege asyryp otyrmyz. Joba kásip ashamyn degen adamǵa úlken kómek. Qazir jylyjaı kásibiniń qyr-syryn tolyq ıgerip aldyq. Aldaǵy ýaqytta qııar ónimin tek ósirip qana qoımaı, ony ári qaraı tereń óńdeý, konservileý, marınadtaý jumystaryn da qolǵa alsaq», – deıdi Alma Ysmaılova.
Alma Ysmaılova joba aıasynda 7 mln teńge qarjy alǵan. Bul qarjyǵa jylyjaı quraldaryn satyp alyp, qııar ósirýmen aınalysady. Jylyna 3 tonna qııar óndirip otyrǵan sharýashylyq ıesi aldaǵy ýaqytta jylyjaı kólemin ulǵaıtýdy josparlap otyr. Murat Ábenov kásipker Sársenkúl Aralbaevanyń shulyq tsehynda boldy. Jeke kásipker «Aýyl amanaty» jobasy aıasynda ótken jyly 5 mln teńge nesıe alyp, shulyq ónimderin shyǵaratyn qural-jabdyqtar satyp alyp alǵan. Qazir úıiniń aldynan shaǵyn tseh ashty.
«Jobanyń múmkindigi joǵary. 2,5 paıyzben alasyń ári tólem kanıkýly da qarastyrylǵan. Búgingi kúni 1 azamatty jumyspen qamtyp otyrmyn. Kúnine 200, 300 keıde 400 danadaı shulyq shyǵaramyz. Alaıda ónimdi satý máselesi de baǵdarlamada qarastyrylsa deımiz. ıAǵnı, áleýmettik dúkenderde satýǵa ruqsat berilse», – deıdi kásipkerler.
Májilis depýtaty Murat Ábenov kásipkerdiń ótinishi boıynsha bul másele aldaǵy ýaqytta eskeriletinin atap ótti.
«Jalpy eldi aralap júrgende «Aýyl amanaty» jobasyna qyzyǵýshylar óte kóp. Bul halyqty eńbek etýge, tabys tabýǵa úıretip otyr. Sondyqtan jobany nasıhattaýdy kúsheıtý kerek. Osyndaı jobalar týraly keń aqparat alý úshin arnaıy platforma ázirleý qajet. Ekinshiden, kásipkerler jobada óndirgen ónimdi satý máselesi qarastyrylsa, áleýmettik dúkenderde satýǵa ruqsat berilse deıdi. Rasymen de áleýmettik dúkenderde «Aýyl amanaty» jobasy aıasynda óndirilgen degen sóre nege bolmasqa. Aldaǵy ýaqytta osy máseleler boıynsha jaýapty organdarmen jumys isteıtin bolamyn», – dedi Májilis depýtaty.
Halyq qalaýlysy sondaı-aq joba aıasynda iske qosylǵan kórpe tigý tsehynyń jumysymen de tanysty.
