Májilis depýtaty Astanada jumys kúnin saǵat 7-den bastaýdy usyndy

ASTANA. KAZINFORM — Májilis depýtaty Asylbek Nuralın Astanada jumys kúni bastalatyn ýaqytty saǵat 9-dan 7-ge aýystyrýdy usyndy. 

— Ashyq statıstıkalyq derekterge súıensek, Astana qalasyndaǵy jumysshylardyń 50%-dan astamy memlekettik mekemelerde qyzmet etedi. Osyǵan baılanysty ortalyq atqarýshy organdardyń ulttyq kompanııalardyń, vedomstvolarǵa baǵynyshty uıymdardyń qyzmetshilerine arnalǵan kólik aǵynyn qaıta retteý máselesin pysyqtaý qajet. Sondaı-aq, aglomeratsııalardaǵy kólik saıasatynyń aıasynda atalǵan sanattaǵy uıymdardyń jumys ýaqytyn aýystyrý máselesin qarastyrý usynylady, — dedi ol.

Depýtattyń sózinshe, zertteýler eńbek ónimdiligi tańǵy saǵattarda áldeqaıda joǵary ekenin kórsetken.

— Jumys kestesin saǵat 9-dan 7-ge jáne 8-ge aýystyrý usynylyp otyrǵan sharalarǵa aıtarlyqtaı saı, — dedi depýtat.

Eske salsaq, 19 naýryzda Óskemende jumys ýaqyty 1 saǵatqa shegerilgen bolatyn.