Májilis depýtaty Astana-Qorǵaljyn-Ulytaý jolyn salýdy usyndy

ASTANA. KAZINFORM – Májilis depýtaty Asylbek Nuralın Premer-mınıstrdiń birinshi orynbasary Roman Sklıarǵa saýal joldap, Astana-Qorǵaljyn-Ulytaý jolyn salýdy usyndy.

- Kólik ınfraqurylymyn damytý – halyqtyń ómir súrý sapasyna jáne óńirler ekonomıkasynyń turaqtylyǵyna tikeleı áser etetin Úkimettiń negizgi strategııalyq mindetteriniń biri. Úkimettiń «Ortalyq – Batys» kólik dálizin ishki qashyqtyqtardy qysqartýǵa, tranzıttik áleýetti arttyrýǵa jáne zamanaýı ulttyq kólik júıesin qalyptastyrýǵa baǵyttalǵan strategııalyq magıstral retinde salý týraly resmı jarııalaǵanyn bilemiz. Sonymen qatar, Ulytaý óńiri uzaq ýaqyt boıy kólik qoljetimdiliginiń shekteýli jaǵdaıynda qalyp otyr. Bul onyń áleýmettik-ekonomıkalyq damýyn tejep, halyqtyń ómir súrý sapasyn tómendetedi. Prezıdent 10 aqpanda ótken Úkimettiń keńeıtilgen otyrysynda bul máseleler týraly: «Bazalyq ınfraqurylymnyń bolmaýy óńirlerdiń damýyn tejeıdi jáne halyqtyń ómir súrý sapasyn tómendetedi, bul ásirese jańadan qurylǵan Abaı jáne Ulytaý oblystarynda aıqyn seziledi. Osy óńirlerge erekshe qoldaý qajet», dep aıtqan bolatyn, - dedi depýtat.

Onyń paıymynsha, qoldanystaǵy Jezqazǵan – Qaraǵandy – Astana avtokólik joly edáýir uzaq qashyqtyǵymen, ásirese Jezqazǵan men Qaraǵandy aralyǵy jolústi tósenish qabatynyń ábden tozýy jáne tranzıttik ótkizý múmkindiginiń shekteýliligimen sıpattalady. Bul jol júrý ýaqytyn uzartyp, kólik-logıstıkalyq shyǵyndardy arttyrady.

- Atalǵan áleýmettik mańyzy zor máseleniń sheshimin halyq ta, jergilikti atqarýshy organdardyń ókilderi de kútip otyr. Ulytaý oblysynyń ákimdigi tarapynan Ulytaý – Shubarkól – Barshyn – Qorǵaljyn –– Astana baǵyty boıynsha tıisti jobalyq-smetalyq qujattama ázirlengeni týraly aqparat bar, - dedi ol.

Asylbek Nuralınniń atap ótýinshe, atalǵan kólik dálizin iske asyrý Astanadan Ulytaýǵa deıingi jol qashyqtyǵyn shamamen eki esege qysqartýǵa (860 shaqyrymnyń ornyna shamamen 450 shaqyrym), kólik jáne logıstıkalyq shyǵyndardy edáýir azaıtýǵa múmkindik beredi. Sonymen qatar usynylyp otyrǵan baǵyt tek ınfraqurylymdyq qana emes, keshendi áleýmettik-ekonomıkalyq mańyzǵa da ıe.

Naqtyraq aıtqanda, óńir turǵyndary úshin jobany iske asyrý halyqtyń erkin, ári yńǵaıly qatynaýyn qamtamasyz etedi. Jergilikti taýar óndirýshiler úshin saýda-sattyq múmkindikterin keńeıtedi. Medıtsınalyq jáne bilim berý qyzmetteriniń sapasyn arttyrýǵa septigin tıgizedi.

- Ulytaý óńiriniń tarıhı jáne ekologııalyq týrızm áleýeti erekshe nazar aýdarýǵa laıyq. Atalǵan joldyń qurylysy jańa týrıstik baǵytty qalyptastyrýǵa jaǵdaı jasap, bılik organdary, bıznes ókilderi, zertteýshiler men tarıhı-mádenı murany nasıhattaýshylar arasyndaǵy yntymaqtastyqty keńeıtedi. Jobalyq esepteýlerge sáıkes, jylyna 50 myńnan astam týrıstter sanyn ulǵaıtý, sondaı-aq jalpy halqy shamamen 30 myńnan astam adamdy quraıtyn jol boıyna jaqyn ornalasqan 28 eldi mekenniń turaqty áleýmettik-ekonomıkalyq damýyn qamtamasyz etý josparlanǵan.

Astana – Qorǵaljyn – Ulytaý avtomobıl joly dálizin iske asyrý ekonomıkany ártaraptandyrýdyń, ınvestıtsııalyq tartymdylyqty arttyrýdyń, shaǵyn jáne orta bıznesti qoldap, jańa jumys oryndaryn qurýdyń, sonymen qatar Qazaqstannyń halyqaralyq bedelin nyǵaıtýdyń mańyzdy quralyna aınalady. Osyǵan baılanysty atalǵan baǵytty kólik ınfraqurylymyn damytýdyń Ulttyq josparyna engizý múmkindigin qarastyryp, ýákiletti memlekettik organdarǵa tıisti tapsyrmalar berýińizdi suraımyz, - dedi ol.

Buǵan deıin tórtinshi munaı óńdeý zaýyty Ulytaý oblysynda salynýy múmkin ekenin jazǵan edik.