Májilis depýtaty agrarlyq mamandyq stýdentteriniń shákirtaqysyn kóterýdi usyndy
ASTANA. KAZINFORM – Agrarlyq jáne veterınarııalyq mamandyqtar stýdentteriniń shákirtaqy mólsherin pedagogıkalyq, medıtsınalyq baǵyttardaǵy shákirtaqylarmen teńestirý kerek. Mundaı usynysty Májilistiń jalpy otyrysynda Premer-mınıstrdiń atyna saýal joldaǵan depýtat Janarbek Áshimjan jasady.
- Azyq-túlik qaýipsizdigi jáne agroónerkásiptik keshenniń turaqty damýy – bul elimizdiń ulttyq qaýipsizdigi men áleýmettik turaqtylyǵynyń basty kórsetkishi. Qazirgi tańdaǵy ózekti máselelerdiń biri – aýyl sharýashylyǵy men veterınarııadaǵy bilikti kadrlardyń tapshylyǵy. Agrarlyq joǵary oqý oryndaryna negizinen aýyl jastary túsetini belgili. 2025 jyly mektep bitirýshi túlekterdiń sany 217 myńnan asty. Mektepterdiń basym bóligi, ıaǵnı 67,4 paıyzǵa jýyǵy aýyldarda ornalasqan. Sonymen qatar, joǵary bilimge degen suranys jyldan jylǵa artyp keledi, 2025 jylǵy qańtardaǵy UBT-ǵa 187 myńǵa jýyq talapker qatysty,- dedi Janarbek Áshimjan.
Depýtattyń atap ótýinshe, agrarlyq mamandar daıyndaý salasyndaǵy memlekettik saıasatta túıtkildi máseleler bar. Sońǵy 10 jylda elimizde memlekettik bilim berý granttarynyń sany 2,5 esege ulǵaıǵanymen, «Aýyl sharýashylyǵy jáne bıoresýrstar» jáne «Veterınarııa» mamandyqtary boıynsha memlekettik granttardyń úlesi 2 esege azaıyp, 8,5 paıyzdan 4,2 paıyzǵa deıin qysqardy.
- Bul el Prezıdentiniń agroónerkásip keshenin ekonomıkadaǵy basty qozǵaýshy kúshtiń birine aınaldyrý jáne bıologııalyq qaýipsizdiktiń negizi retinde veterınarlyq qyzmetti damytý týraly tapsyrmalaryna tikeleı qaıshy kelip otyr. Osy oraıda áleýmettik faktorlardy da atap ótken jón. Qazirgi tańda agrarlyq jáne veterınarııalyq mamandyqtarda oqıtyn stýdentterdiń shákirtaqysy 52 myń teńgeni quraıdy. Bul pedagogıkalyq jáne medıtsınalyq baǵyttarmen salystyrǵanda áldeqaıda tómen. Aýyldyq jerdegi otbasylardyń tabysy turaqsyz. Mundaı jaǵdaıda balalardy qalada oqytý qııampet-qaıym. Nátıjesinde memleket agroónerkásip keshenin basym baǵyt dep jarııalaǵanymen, aýyl jastarynyń agrarlyq bilim alýyna qajetti jaǵdaılar jasalmaı otyr,- dedi ol.
Sondyqtan Májilis depýtaty azyq-túlik qaýipsizdigin nyǵaıtý, aýyldyń áleýetin artyrý, túıip aıtqanda Prezıdent tapsyrmalaryn naqty oryndaý úshin Úkimet basshysy Oljas Bektenovke myna sharalardy iske asyrýdy usyndy:
- «Aýyl sharýashylyǵy jáne bıoresýrstar» jáne «Veterınarııa» baǵyttary boıynsha memlekettik bilim berý tapsyrysyn qaıta qarap, granttar sanyn arttyrý;
- agrarlyq jáne veterınarııalyq mamandyqtar stýdentteriniń shákirtaqy mólsherin pedagogıkalyq jáne medıtsınalyq baǵyttardaǵy shákirtaqylarmen teńestirý;
- Qazaq ulttyq agrarlyq zertteý ýnıversıtetiniń 2026-2030 jyldarǵa arnalǵan damý baǵdarlamasyn jedel túrde bekitý;
- Bastalǵan ınvestıtsııalyq jobalardy aıaqtaý úshin 4 beıindik ǵylymı-zertteý ınstıtýty jáne 1 tájirıbelik sharýashylyqty senimgerlik basqarý sharttarynyń merzimin 2030 jylǵy 31 jeltoqsanǵa deıin uzartý.
Buǵan deıin «Bolashaq» baǵdarlamasynyń shákirtaqysy men tólemderiniń mólsheri qaıta qaralýy múmkin ekenin jazǵan edik.