Májilis depýtaty esirtki saýdasy týraly: Munyń artynda joǵary laýazymdy tulǵalar bary anyq
ASTANA. KAZINFORM – Májilis depýtaty Rýslan Berdenov elimizde esirtkimen kúreske arnalǵan 5 jyldyq keshendi jospar ázirleýdi usyndy.
«Meni tamyryn keń jaıǵan sıntetıkalyq esirtki kesirinen bolashaǵyna balta shaýyp jatqan azamattardyń taǵdyry alańdatýda. Búgin sıntetıkalyq esirtki qoljetimdi. Alý úshin ınternet jáne gadjet bolsa boldy. Qazaqstanda nashaqorlardyń esebinde 18 myńnan astam adam tirkelgen. Elimizde 2023 jyly 1 mln grammnan astam esirtki tárkilense, bıyl 8 aıda 900 myń grammǵa jetken. Esirtkini satýǵa baılanysty 3145 adam qylmys jasap onyń 2560-y sottalyp ketken. Bul qarqynmen 10 jylda 1 aýyldyń turǵyndaryna teń adam sottalyp ketpek», - dedi Rýslan Berdenov Májilis otyrysynda Úkimet basshysy Oljas Bektenovtiń atyna depýtattyq saýal joldaı otyryp.
Onyń málimetinshe, búginde 37 myńnan astam sottalǵandardyń 8% esirtki qylmysyna qatysty jazasyn ótep jatyr.
Halyq qalaýlysyn esirtki qylmysynyń jetegine ergen azamattardyń jas mólsheriniń 16-17 jasqa tómendeýi men áıel qylmyskerler sanynyń ósýi alańdatady.
Odan ári Májilis depýtaty Premer-Mınıstrdiń nazaryna nashaqorlyqqa qatysty qoǵamdy tolǵandyratyn suraqtaryn joldady.
Birinshi: Elimizdiń aımaqtarynda jasyryn esirtki laboratorııalary qarqyndy jumys isteıtini jáne olardy túrli organdar qorǵaıtyny jaıly pikir qalyptasqan. Osy baǵytta tekserý jumystaryn uıymdastyrý qajet.
Ekinshi: Esirtkiniń elge kirý kózderiniń biri shekara bolǵandyqtan, Shekara qyzmeti qajetti materıaldyq-tehnıkalyq quraldarmen qanshalyqty sapaly jabdyqtalǵan?
Úshinshi: Esirtki satýǵa qoldanylatyn sheteldik messendjerlerde esirtki satýdy uıymdastyrýshylar jaıly qansha usynys joldanyp, qanshasy qoldandy, qanshasy qaraýsyz qaldy? Olarmen yntymaqtastyq qaı deńgeıde?
Tórtinshi: Esirtkiniń jańa túrlerin anyqtaıtyn zamanaýı sot saraptamasy organdarynyń materıaldyq-tehnıkalyq jabdyqtalýy jáne saraptama merzimin qysqartý jumysy qanshalyqty tolyq atqarylýda?
Besinshi: Biz esirtkimen kúresti qarjy saýaty tómen, bilimi joq, áleýmettik jaǵdaıy nashar «zakladchıktermen» shektelip otyrmyz? Qoǵam nege osy balalarǵa esirtki satýǵa ıtermelep otyrǵan qylmystyq toptardyń ustalǵanyn estimeıdi? Búgin biz máseleniń saldarymen kúresýdemiz.
«Osy toptardyń artynda joǵary laýazymdy múddeli tulǵalar bar eken anyq. Osyǵan oraı nashaqorlyqqa jáne esirtki bıznesine qarsy kúreske baǵyttalǵan 5 jyldyq keshendi josparda Іshki ister, Ádilet, Densaýlyq saqtaý, Ǵylym jáne joǵary bilim, Oqý-aǵartý, Tsıfrlyq damý mınıstrlikteri, Shekara qyzmeti men Ulttyq qaýipsizdik komıtetine naqty sharalardy bekitip, aldyn alý, sebepterin anyqtaý jáne saldarymen kúresýge qatysty tolyqtyrýlardy birlesip engizýdi usynamyn», - deıdi R. Berdenov.
