Parlament buralqy ıtterdi qaıtarymsyz aýlaý modelin qoldady
ASTANA. KAZINFORM – Májilis «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» Zańǵa Senat jańa redaktsııada usynǵan jekelegen baptarmen kelisti.
- Qaralyp otyrǵan zańǵa Parlament Senaty tarapynan birqatar naqtylaýshy sıpattaǵy túzetýler engizildi. Atap aıtqanda, ıesiz janýarlardyń sanyn retteý máseleleri, onyń ishinde tártibi men merzimderi jergilikti ókildi organdardyń quzyretine berildi. Munymen qosa, «ıesiz janýarlar» uǵymy naqtylandy. Janýarlardy jansyzdandyrý týraly sheshimdi veterınarııalyq qorytyndy negizinde qabyldaý normasy tolyqtyryldy jáne ózge de túzetýler engizildi. Jalpy alǵanda, Májilis qabyldaǵan zańnyń tujyrymdamasy ózgerissiz saqtalady, engizilgen túzetýler naqtylaýshy sıpatqa ıe. Zańnyń tujyrymdamasy ózgermeıdi. Buralqy ıtterdi qaıtarymsyz aýlaý modeli saqtalady jáne ony Senat qoldady, - dedi Májilis depýtaty Erbolat Satybaldy.
Aıta keteıik, Memleket basshysy Qasym-Jomart Kemeluly Toqaev janýarlarǵa jaýapkershilikpen qaraý mádenıetin qalyptastyrýdyń, úı janýarlaryna qatygezdikke jol bermeýdiń, sondaı-aq janýarlar ıeleriniń jaýapkershiligin kúsheıtýdiń mańyzdylyǵyn erekshe atap ótti.
- Prezıdent tapsyrmasyn iske asyrý maqsatynda janýarlardy esepke alý máselesin naqty reglamentteý qajet. Senat usynǵan redaktsııada qandaı da bir quqyqtyq aıqynsyzdyq bar. Sondyqtan janýarlardy esepke alý jáne chıpteý menshik quqyǵyn rastaýdyń negizgi ári tıimdi tetigi bolýy tıis dep sanaımyz. Qarapaıym tilmen aıtqanda, eger janýar esepke alynbasa – onyń ıesin anyqtaý múmkin emes, al ıesi anyqtalmasa – jaýapkershilik te bolmaıdy. Prezıdent tapsyrmasyn oryndaý maqsatynda Májilis depýtattary tıisti túzetýler ázirledi. Atalǵan túzetýler janýarlar ıeleriniń jaýapkershiligin kúsheıtetin normalarmen birge, búgin birinshi oqylymda maquldanǵan «ańshylyq sharýashylyǵy jáne janýarlar dúnıesin saqtaý máseleleri týraly» zań jobasy aıasynda qaralatyn bolady. Joǵaryda aıtylǵandardy eskere otyryp, Májilistiń Ekologııa máseleleri jáne tabıǵat paıdalaný komıteti «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» zańǵa Senat engizgen túzetýlermen kelisýdi usynady, - dedi depýtat.
Májilistiń jalpy otyrysynda palata depýtattary búl túzetýlermen kelisti.
Eske salsaq, ótken apada Senatt «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» Zańdy qarady. Senatorlar qujattyń jekelegen baptaryn jańa redaktsııada usynyp, ony Májiliske qaıtardy.
