Májilis birqatar iri jobaǵa Dúnıejúzilik bank qarajatyn tartatyn kelisimdi ratıfıkatsııalady
ASTANA. KAZINFORM — Búgin Májilistiń jalpy otyrysynda Qazaqstannyń turaqty damý men ósýin járdemdesýge baǵyttalǵan yntymaqtastyqty keńeıtý maqsatynda Halyqaralyq qaıta qurý jáne damý bankimen, Halyqaralyq qarjy korporatsııasymen jáne Kópjaqty ınvestıtsııalar kepildigi agenttigimen Áriptestik týraly negizdemelik kelisimdi ratıfıkatsııalaý týraly Zańdy qabyldady.
Premer-mınıstrdiń orynbasary — Ulttyq ekonomıka mınıstri Serik Jumanǵarınniń aıtýynsha, zań jobasy Qazaqstannyń turaqty damý men ósýin járdemdesýge baǵyttalǵan yntymaqtastyqty keńeıtý maqsatynda Halyqaralyq qaıta qurý jáne damý bankimen, Halyqaralyq qarjy korporatsııasymen jáne Kópjaqty ınvestıtsııalar kepildigi agenttigimen Áriptestik týraly negizdemelik kelisimdi ratıfıkatsııalaýdy qarastyrady.
— Bul kelisimge ótken jylǵy 18 maýsymda Astanada qol qoıylǵan. Ol Dúnıejúzilik bankimen strategııalyq yntymaqtastyqtyń jańa kezeńiniń bastalýyna, sondaı-aq eldegi jobalardy tıimdi jáne jedel júzege asyrýdy qamtamasyz etý qajettigine oraı jasalǵan. Negizdemelik kelisimde memlekettik kepildikpen qaryzdar men granttyq jobalardy iske asyrý kezinde Dúnıejúzilik banktiń saıasattary men erejelerin qoldanýǵa baılanysty ulttyq zańnamadan ózgeshe normalar belgilengen. Atap aıtqanda, taýarlardy, jumystar men kórsetiletin qyzmetterdi satyp alý qaǵıdalaryn, sybaılas jemqorlyqqa qarsy, ekologııalyq, áleýmettik, eńbek, genderlik standarttardy jáne Dúnıejúzilik bank tobynyń aqparatty kórsetý normalaryn qoldaný kózdeledi. Ózderińiz biletindeı, Dúnıejúzilik bank — álemdegi eń bedeldi halyqaralyq qarjy ınstıtýttarynyń biri. Bizdiń elde ol 30 jyldan astam jumys isteıdi. Kólik, bilim berý, ekologııa, tsıfrlandyrý, qarjy salalarynda 8 mlrd dollardan astam somaǵa 50 joba iske asyrylǵan bolatyn, — dedi mınıstr.
Onyń atap ótýinshe, Dúnıejúzilik banktiń memlekettik kepildikpen boryshtardy iske asyrý jónindegi erejeleri damýshy elderdiń kópshiliginde qoldanylatyn eń úzdik álemdik tájirıbesin kórsetedi.
— Ádette, memlekettik kepildikpen beriletin boryshtar uzaq merzimdi (35 jylǵa deıin) jeńildetilgen qarjylandyrý túri. Olar memlekettik qaryzdyń ulǵaıýyna ákelmeıdi jáne ulttyq baǵdarlamalyq maqsattarǵa qol jetkizýdi qamtamasyz etedi. Osylaısha, kelisim jobalardy qarjylandyrý quraldaryn keńeıtýge, memlekettiń shyǵystaryn basym jobalarǵa qaıta bólý esebinen bıýdjetke túsetin júktemeni azaıtýǵa, sondaı-aq jobalardy iske asyrý kezinde rásimderdi ońtaılandyrýǵa múmkindik beredi, — dedi ol.
Vıtse-premer málimetinshe, kelisim kúshine engennen keıin birqatar ınfraqurylymdyq joba boıynsha jumys bastalady. Olar:
- «Jezqazǵan-Qaraǵandy» jáne «Beıneý-Sekseýil» avtojoldaryn qaıta jańartý jáne salý;
- Qazaqstandaǵy temirjol qatynasy men kólik baılanysyn transformatsııalaý jobasyn iske asyrý;
- Qambarata GES-1-di salý jáne basqa jobalar.
— Uzaq merzimdi josparda kelisim aıasynda Dúnıejúzilik banktiń jobalaryn iske asyrý JІÓ-niń ósýine, jumys oryndaryn qurýǵa, jeke sektor men ShOB-ty damytýǵa, ınnovatsııalardy yntalandyrýǵa, ınvestıtsııalyq ahýaldy jaqsartýǵa járdem kórsetedi. Aıta keterligi, 2020 jyly Qazaqstan Úkimeti men Azııa Damý banki arasynda uqsas kelisim ratıfıkatsııalanǵan bolatyn. Jalpy, kelisimdi ratıfıkatsııalaý teris áleýmettik-ekonomıkalyq jáne quqyqtyq saldarǵa ákep soqpaıdy, sondaı-aq respýblıkalyq bıýdjetten qosymsha qarajat bólýdi talap etpeıdi, — dedi Serik Jumanǵarın.
Osyǵan deıin Parlament Májilisi jeke detektıvtik qyzmetke qatysty zań jobasyn qaraıtynyn jazǵanbyz.