Májilis brakonerlikke qarsy is-qımyldy kúsheıtetin zań jobasyn birinshi oqylymda maquldady
ASTANA. KAZINFORM — Májilis «Ańshylyq salasy jáne janýarlar dúnıesin saqtaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasy men oǵan ilespe qujatty birinshi oqylymda maquldady.
— Zań jobalarynyń negizgi maqsaty — janýarlar dúnıesin turaqty paıdalanýyn qamtamasyz etý, bıoártúrlilikti saqtaý jáne osy saladaǵy memlekettik basqarýdyń tıimdiligin arttyrý. Zań jobasynda Jer jáne Orman kodeksterine, sondaı-aq «Jekelegen qarý túrleriniń aınalymyn memlekettik baqylaý týraly», «Janýarlar dúnıesin qorǵaý, ósimin molaıtý jáne paıdalaný týraly», «Agroónerkásiptik keshendi jáne aýyldyq aýmaqtardy damytýdy memlekettik retteý týraly», «Erekshe qorǵalatyn tabıǵı aýmaqtar týraly» zańdaryna ózgerister engizý kózdelgen, — dedi zań jobalary boıynsha negizgi baıandama jasaǵan depýtat Dúısenbaı Turǵanov.
Onyń aıtýynsha, usynylyp otyrǵan normalar salany basqarýdyń neǵurlym ashyq jáne zamanaýı tetikterin qalyptastyrýǵa, baqylaýdyń tsıfrlyq quraldaryn engizýge, tabıǵat qorǵaý zańnamasyn buzǵany úshin jaýapkershilikti kúsheıtýge jáne tabıǵı resýrstardy utymdy paıdalaný úshin qosymsha jaǵdaılar jasaýǵa baǵyttalǵan.
— Sonymen qatar, atalǵan túzetýlerdi iske asyrý janýarlar dúnıesi obektilerin esepke alý men monıtorıng sapasyn arttyrýǵa, brakonerlikke qarsy is-qımyldy kúsheıtýge, sondaı-aq janýarlar dúnıesin qorǵaýdyń quqyqtyq jáne uıymdastyrýshylyq negizderin nyǵaıtýǵa múmkindik beredi, — dedi ol.
Budan buryn Májilis depýtattarynyń kıik sanyn retteý máselesin ańshylyq qojalyqtarǵa da berý usynysyna Úkimet qarsylyq tanytqanyn jazǵanbyz.
