Májilis bırja bottaryna tyıym salatyn zańdy qabyldady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bırja saýdasy máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Zań Parlamenti Májilisi depýtattarynyń bastamashylyǵymen ázirlenip, 2024 jylǵy 18 qyrkúıekte birinshi oqylymda maquldandy.
«Eger taýar bırjalary ashyq jáne erejelerge saı jumys istese, olardyń ekonomıkadaǵy róli artady. Zań osy maqsattardy oryndaý úshin ázirlendi jáne birqatar máselelerdi sheshedi. Osy qujatty ekinshi oqylymǵa daıyndaý kezinde depýtattardan tıisti usynystar kelip tústi», - dedi Májilis depýtaty Ekaterına Smyshlıaeva.
Bul turǵyda klırıngtik ortalyqtardyń baǵdarlamalyq qamtamasyz etilýine qoıylatyn talaptar engizildi, sondaı-aq áleýmettik mańyzy bar bırjalyq taýarlarmen saýda-sattyqty uıymdastyrý tártibi naqtylandy, taýar bırjalarynyń jarǵylyq kapıtalynyń turaqty shamalary belgilendi.
Májilistiń Ekonomıkalyq reforma jáne óńirlik damý komıtetiniń málimetine qaraǵanda, zań aıasynda taýar bırjasyn retteýdiń negizgi maqsattary men qaǵıdattary aıqyndaldy. Sonymen qatar, taýar bırjasy músheleriniń qyzmetin júzege asyrý tártibi jetildiriledi: avtomattandyrylǵan jedeldetip óńdeý jáne satyp alý-satýǵa ótinim berý úshin bot-tehnologııalardy paıdalanýǵa tyıym salynady.
Munymen qosa, memlekettik baqylaý (taýar bırjalarynyń lıtsenzııasyn toqtata turý jáne odan aıyrý) keńeıtiledi.
Budan buryn habarlanǵandaı, Qazaqstanda bırjadaǵy bottardy paıdalanýǵa tyıym salynady.
