Májilis «Aıbyn» ordenin dańqty batyrlardyń esimimen ataýǵa qatysty qujatty talqylaıdy

ASTANA. KAZINFORM – Parlament Májilisiniń qaraýyna «Qazaqstan Respýblıkasynyń memlekettik nagradalary týraly» Qazaqstan  Respýblıkasy Zańyna ózgerister men tolyqtyrý engizý týraly» zań jobasy kelip tústi.

«Bul zań jobasy Memleket basshysynyń Ulttyq quryltaıdyń úshinshi otyrysynda bergen tapsyrmasyn oryndaý aıasynda Parlamenttegi bir top depýtattyń bastamasymen ázirlendi. Memlekettik nagradalar júıesin jetildirý jáne asa kórnekti áskerı turǵalarymyzdyń erligin máńgi este qaldyrý maqsatynda Saǵadat Nurmaǵambetov, Baýyrjan Momyshuly jáne Raqymjan Qoshqarbaevtyń esimderin «Aıbyn» ordeniniń dárejelerine berý jóninde ózgerister men tolyqtyrýlar usynylady. Májilistiń Halyqaralyq ister, qorǵanys jáne qaýipsizdik komıteti osy zań jobasy boıynsha tıisti qorytyndyny daıarlaýǵa daıyn», - dedi Májilis depýtaty Aıgúl Quspan palatanyń jalpy otyrysynda.

Eske salsaq, bıyl naýryz aıynda Prezıdent Qasym-Jomart Toqaev «Aıbyn» ordenin túrli dárejesin dańqty batyrlardyń atymen ataýdy usynǵan edi. 

Osydan keıin Májilis depýtaty Edil Jańbyrshın bıyl dańqty batyrlar atyndaǵy ordenderdi sarbazdarǵa tabystaýǵa qatysty depýtattyq saýal joldady.