Májilis aýyl ákimdikteriniń bıýdjetin arttyratyn zańdy qarastyryp jatyr
ASTANA. KAZINFORM — Prezıdent aýyl ákimderiniń ókilettiligin kúsheıtý boıynsha zańǵa ózgerister engizý týraly tapsyrma berdi. Sol tapsyrma aıasynda ákimdikterge qandaı múmkindik berý kerek? Olardyń mártebesin kóterý úshin ne isteý qajet? Jaqynda ótken Aýyl ákimderi forýmynyń nátıjesi qandaı? Bul suraqtarǵa Májilis depýtaty Muqash Eskendirov jaýap berdi.
Májilis depýtaty aýyl ákimderi aıtatyn eń basty másele — bólinetin qarjynyń azdyǵy ekenin atap ótti.
— Biz qazir Májiliste «Jergilikti memlekettik basqarý jáne ózin-ózi basqarý týraly» zańǵa ózgeristerdi engizýdi qarastyryp jatyrmyz. Men sol jumys tobynyń basshysymyn. Ázirge jumys tobynyń eki otyrysy ótti, depýttattar tarapynan, ókiletti organdardan, mınıstrlikten kóptegen usynystar kelip jatyr. Eki otyrystyń ózinde Ekonomıka mınıstrligimen salyqtardy aýylda kóbirek qaldyrýdy talqylap, Úkimet qorytyndysyna jiberdik. Úkimet qorytyndysy shyqqan soń, naqty nátıjelerin aıta alamyz, — dedi M. Eskendirov Jibek Joly telearnasyna bergen suhbatynda.
Sonymen birge, Májilis depýtaty aýylǵa qyzmet etetin dánekerleýshi, mehanızator sekildi jumysshy mamandarǵa arnaıy shtattyq oryndar qarastyrylmaǵanyn kóterdi. Jańa zań aıasynda aýyldarda mamandar sanyn kóbeıtý de qarastyrylǵan.
— Aýyl ákimderiniń mártebesin arttyrýdy Pedagogter mártebesimen shatastyrmaý kerek. Bir ǵana aýylǵa bólinetin qarajat máselesi sheshilse, sonyń ózi úlken kómek bolady. Árıne, «Rodına» sekildi maqtan tutarlyq, tirek aýyldar bar. Áıtse de kóptegen aýyldar áli de shashylyp jatyr, aýyldyń ákimderine isteıtin jumys kóp. Elimizdiń túrli óńirinde nebir aýyldardy kórip júrmiz, ne tazalyq joq, ne aǵash egilmegen. Sondyqtan, ákim saılanǵan soń, eń birinshi aýyldy tazalap alý kerek shyǵar, — deıdi depýtat.
Eske sala ketsek, 28 qarashada Astanada aýyl ákimderiniń forýmy ótti.
Onda Prezıdent Qasym-Jomart Toqaev aýyl ákimderiniń dıalog-platformasynda aýyl ákimderiniń ókilettigin kúsheıtý kerek ekenin aıtty.