Májilis Astana men Bishkektegi dıplomatııalyq nysandar týraly kelisimdi qaraýǵa aldy
ASTANA. KAZINFORM – Májilistiń Halyqaralyq ister, qorǵanys jáne qaýipsizdik komıteti Qazaqstan men Qyrǵyzstan úkimetteri arasyndaǵy dıplomatııalyq ókildikterge arnalǵan ǵımarattar men jer ýchaskelerin ózara óteýsiz paıdalaný týraly kelisimdi ratıfıkatsııalaý jónindegi zań jobasyn qaraýǵa aldy.
Qujat Májilistiń jalpy otyrysynda tanystyryldy. Depýtat Aıdos Sarym kelisimge 2025 jylǵy 22 tamyzda Bishkek qalasynda qol qoıylǵanyn málimdedi.
— Kelisimniń maqsaty – Astana men Bishkek qalalarynda Qazaqstan men Qyrǵyzstan elshilikteriniń, sondaı-aq eki eldiń Tótenshe jáne Ókiletti elshileriniń rezıdentsııalaryna arnalǵan ǵımarattar men jer telimderin ózara óteýsiz paıdalanýǵa berý, — dedi depýtat.
Onyń aıtýynsha, qujatta jer ýchaskeleri men ǵımarattardy berý tártibi men paıdalaný sharttary naqty kórsetilgen.
— Komıtet zań jobasyn qarap, tıisti qorytyndy ázirleýge daıyn. Qoldaýlaryńyzdy suraımyn, — dedi Aıdos Sarym.
Daýys berý nátıjesinde sheshim biraýyzdan qabyldandy. Jalpy otyrysqa qatysqan 85 depýtattyń barlyǵy zań jobasyn qoldady.
Aıta keteıik, buǵan deıin Memlekettik keńesshi Erlan Qarın Qyrǵyz Respýblıkasynyń memlekettik hatshysymen kezdeskeni týraly jazǵan edik.
