Májilis áskerı daıarlyqpen qamtýdy keńeıtýge arnalǵan qujatty qabyldady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine áskerı-patrıottyq tárbıe máseleleri boıynsha tolyqtyrýlar engizý týraly» zań jobasy ekinshi oqylymda qaralyp, qabyldandy.
2024 jylǵy qarashada zań jobasyn Parlament Májilisi birinshi oqylymda maquldady. Qujatty talqylaý barysynda depýtattardyń Eńbek kodeksine jáne 11 zańǵa ózgerister men tolyqtyrýlar engizetin túzetýleri qaralyp, qabyldandy. Olar:
- azamattardy áskerı-patrıottyq tárbıeleýdiń mańyzdylyǵyn arttyrýǵa jáne osy baǵyttaǵy jumysty jandandyrýǵa;
- bilim berýdiń barlyq deńgeılerinde áskerı daıarlyqty jetildirýge jáne qamtýdy keńeıtýge;
- áskerı qyzmettiń bedelin arttyrýǵa jáne áskerı, arnaýly oqý oryndarynyń qyzmetin keńeıtýge;
- áskerı jıyndarǵa shaqyrýdyń ornyna turǵylyqty jeri boıynsha óteýli negizde kýrstyq áskerı daıarlyqtan ótýge múmkindik berý arqyly áskerı mindettilerdi áskerı daıarlyqpen jáne qaıta daıarlaýmen qamtýdy keńeıtýge;
- áskerı esepke alýdy avtomattandyrýǵa jáne azamattardy áskerı qyzmetke shaqyrýdy jetildirýge, sondaı-aq áskerı qyzmetke shaqyrýdy keıinge qaldyrý men odan bosatýdy negizderin ońtaılandyrýǵa;
- Qarýly Kúshterdiń, basqa da áskerler men áskerı quralymdardyń jasaqtalýyn arttyrýǵa baǵyttalǵan.
Májilistiń Halyqaralyq ister, qorǵanys jáne qaýipsizdik komıtetiniń málimetine qaraǵanda, usynylǵan túzetýler memlekettik shyǵyndardy arttyrmaı, azamattardy áskerı daıarlyqpen qamtýdy keńeıtip, onyń sapasyn arttyrady. Sonymen qatar, artyq bıýrokratııalyq rásimderdi alyp tastaý jáne qyzmetti proaktıvti formatta júzege asyrý, sondaı-aq áskerı daıarlyqtyń balamaly tásilderin engizý bıýdjet qarajatyn únemdeýge yqpal etetin bolady.
- Zańnamaǵa áskerı esepke alýdy avtomattandyrýǵa jáne azamattardy merzimdi áskerı qyzmetke shaqyrýdy jetildirýge, sondaı-aq merzimdi áskerı qyzmetke shaqyrýdy keıinge qaldyrý jáne bosatý negizderin ońtaılandyrýǵa baǵyttalǵan ózgerister qabyldandy. Atap aıtqanda, SMS-habarlamalardyń mártebesi aıqyndalyp, memlekettik aqparattyq júıelerdi áskerı esepke alý derekter bazasymen biriktirý tájirıbesi zańmen bekitildi, - dedi Májilis depýtaty ıÝlııa Kýchınskaıa.
Eske salsaq, byltyr kúzde Qorǵanys mınıstriniń orynbasary Shaıh-Hasan Jazyqbaev jyl saıyn merzimdi áskerı qyzmetke shaqyrylatyn jastardyń sanyn arttyrý týraly usynysqa jaýap berdi.